KRALENDIJK – Djasabra benidero, 25 di yüli ta Dia di Penshonado. A bira un tradishon kaba ku tur aña riba e dia akí, Union di Penshonado pa Adelanto i Hustisia (UPAH) sekshon Boneiru ta tene un selebrashon pa su miembro- i invitadonan. Lástimamente debí na e situashon ku mundu ta pasando aden pa motibu di coronavírùs i medidanan korespondiente pa evitá grupo grandi, di distansia soshal i di higiena ku gobièrnu a introdusí, direktiva di UPAH Bonaire ta anunsiá ku e selebrashon anual akí no por tuma lugá e aña akí.

Dia di Penshonado no ta un dia pa selebrá so, pero tambe pa para ketu i reflehá riba kiko ta nifiká pa ta un penshonado. Ser penshonado ta un privilegio, despues di a kontribuí pa añanan pa medio di labor prestá na benefisio di nos komunidat, gobièrnu-, òf kompania- i entidatnan liá ku gobièrnu.Dia di Penshonado ta un dia pa reflehá tambe riba derechonan atkerí pa medio di e penshun ku a konstruí a traves di añanan di labor i kon ta protehá interes di penshonadonan kontra e diferente menasanan ku tin pa medidanan di ousteridat relashoná ku COVID-19 i e situashon finansiero mundial.

Di otro banda mester para ketu tambe na e debilidatnan ku e edat di penshun ta trese kuné. Esei klaramente a keda demonstrá den e époka di coronavírùs akí, kaminda partikularmente e grupo di grandinan a resultá di ta esun di mas vulnerabel pa COVID-19. P’esei nos mester ta èkstra kouteloso i protehá nos mes bon. I esei ta hustamente e motibu tambe pa kanselá e selebrashon di e aña aki komo prekoushon. Den e tempu difísil akí di coronavírùs, direktiva ta supliká tur penshonado pa prevení i tene nan mes na e reglanan ku outoridatnan ta stipulá i pa kuida kurpa.

For di awor direktiva di UPAH Bonaire ke felisitá tur miembro i nan famia riba dia di penshonado. Felis Dia di Penshonado dia 25 di yüli 2020.

Share This
error: Content is protected !!