KRALENDIJK – James Finies den un karta habrí na trahadónan di BOPEC ta bisa ku hopi hende no a partisipá na e manifestashon ku tabata tin resientemente, debi na desepshon di den pasado. Nan tin deskonfiansa den sierto lidernan sindikal. E ta haña ku e sekretario di USIBO sr. Norwin Nòchi Willem no por ta konsehero prinsipal ni liderá pasó e ta manchá polítikamente.

E karta habrí di Finies ta bisa ku riba invitashon publiko di USIBO pa trahadonan di Bopec, NKBB a partisipá den e manifestashon pasífiko riba 17 di jüli último. Na promé lugá nos ta felisitá e organisadónan i trahadónan i tur otro ku a sostené e manifestashon i a entregá un manifesto na gezaghèber Edison Rijna. E trahadónan I sostenedónan a mustra un akto di kurashi pa para pa nan derechonan i di resistensia kontra di e kurso aktual di eskalashon di atake kontra nos derecho fundamental demokrátiko e derecho di libertat di ekspreshon I manifestashon pasífiko.

NKBB a risibi hopi reklamo di varios persona ku nan no ta partisipa mas den protestanan o manifestashonan asta ora esaki ta di sindikatonan, debi ku a kousa hopi desepshon serka esnan ku a protesta I a sali I riska nan seguridat manera e ultimo manifestashon grandi kontra di korte-den-penshon pasobra esakinan ta mancha ku politika o ta wordu usa pa agendanan politiko. Un di nombernan prominente ku ta wordu menshona ta di e sekretario di USIBO, Sr Norwin Nòchi Willem, e bosero prinsipal den e manifestashon di BOPEC aki komo politika. Un konseho konstruktivo pa USIBO, basa riba e tantisimo reakshonnan I deskonfiansa, i pa bolbe krese e konfiansa den pueblo ta pa evita e senjalnan-di-atvertensia nan di pueblo, di ta metementu di politika den manifestashonan. Tambe pa enkurasha liderasgo no-politiko pa sindikatonan pa por lidera e movemientonan aki. I pa tene I mantene esunan aki ku tin hopi eksperiensa I sabidoria I gran balor manera Sr Willem ku ta mancha ku politika komo nan konseheronan prinsipal I miembronan di direktiva pero partas di kortina. Tur esaki ta pa na benefisio di bolbe krese e konfiansa den pueblo pa por manifesta masalmente sin prehusio di konsekuensianan politiko.

Dor ku e petishon na e gobierno lokal I esun Hulandes tabata pa tene Bopec habri, NKBB ta konseha tur e 300+ trahadonan I nan famia di Bopec-PDVSA pa demanda pa Bopec keda habri I funshonal I no pa pensa pa bai Hulanda ta e solushon. No mester pensa pa bandona Bonaire bai biba na Hulanda riba WW uitkering I laga tur kos ku a konstrui tur e anjanan aki atras pa e Hulandesnan, ku ta wardando pa kumpra boso kasnan I kontinua na imigra yena Bonaire ku nan mes hendenan. Boso lo mester start di imediato ku protesta non-stop pa lucha pa derecho igual, meskos ku na Hulanda pa mesun benefisionan di WW uitkering na Bonaire tambe pa ta meskos ku na Hulanda. Na Hulanda esaki ta 70 pa 75% di bo lastu salario, o minimo ca 1400 euro pa luna I no loke esaki ta na Bonaire ku ta algu mas ku 200 dollar pa quinsena. Esaki lo ta e uniko manera pa gobierno Hulandes tene Bopec habri. Pasobra Hulando no tin ningun intenshon pa hisa e WW uitkering I benefisionan sosial na Bonaire hasi nan igual ku Hulanda, pasobra esaki lo stroba nan planan di imigrashon-Hulandes pa establese I kolonisashon di Bonaire, pasobra si nan hise igual ku na Hulanda I ora ey tur nos Bonerianonan ku ta bibando pafo lo imigra bek pa Bonaire I esaki lo balansa bek e demografia I poder demokratiko na fabor di e kultura I manera di biba Boneriano.

Un otro punto ku nos lo ke pone atenshon na dje ku durante di e diskursonan dirigi na gezaghebber Rijna, kontinuamente tabata referi na Sr Rijna komo “tata” di pueblo. Pa motibu ku ahinda nos ta den Juli, luna di abolishon di sklabitud na 1863, ku gezaghebber ta un nombrashon no-demokratiko kolonial di parti di e institushon di e tragedia I kruel pasado inhumano, I dor di keda referi na e figura kolonial aki komo “tata”, nos pueblo Boneirano humilde I inosente lo wordu stroba den su proseso di emasipashon I nunka lo komprende nan derechonan. E ideologia aki lo kausa nan pa no laga bai di depensia I loyalidayt na figuranan, institushonan I gobernashon kolononial Hulandes.

Pa termina, un di e motibunan prinsipal di e gobierno Hulandes pa sera Bopec-PDVSA ta pa konverti esaki den un sorto I “area-natural” pa motibu di polushon etc pero e gobienro Hulandes por tin diferente otro motibu. E motibu prinsipal ta e gera-ekonomiko di Merka sostena pa Hulanda ta pa tuma kontrol over di e reservanan di pertoli I gas mas grandi na mundo ku ta na Venezuela. E kompania Hulandes Shell ku a bandona Korsou na 1983 kreando un krisis ekonomiko I kaos I ku e hendenan a hui bai Hulanda; ta meskos e gobierno Hulandes ta spera ku sera Bopec-PDVSA, ku Bonerinan tambe lo hui bai Hulanda.

James Finies di NKBB durante e manifestashon pasífiko riba 17 di jüli último
Share This
error: Content is protected !!