KRALENDIJK – Suidadano Angela Martis a manda un karta pa Pedro de Jongh, rogando pa duna atenshon na un situashon di años den Tanki Matrimonio. Segun e suidadano Bonaire Builders ta laba man i tira falta riba OLB i OLB ta tira falta riba Bonaire Builders mientras habitantenan ta esun ku ta sufri.

“Pa mas ku 10 aña Tanki Matrimonio ta hopi deplorabel, i momentu di yobida ta un desaster total tin na un parti di e kaminda, unda esun di asfalt ta topa e parti di kaminda di tera. Esaki ta e área pegá ku tereno konosí pa APNA.

Mi ta biba na Kaya Tanki Matrimonio 26, ku ta nèt na e kaminda di tera ta topa esun di asfalt.

Último tempu a bira asina fastioso. Na momentu ku áwaseru kai, no por drenta kura di e kas ku outo ni na pia, pasobra awa ta yena ful dilanti bo porta di kura.

Na diferente okashon a pidi pa drecha e situashon, ta primintí sinembargo nunka a hasi algu pa drecha e situashon.

Despues ku a traha e proyekto kasnan di Tanki Matrimonio, ora a pidi OLB pa drecha e kaya, nan ta bisa ta Bonaire Builders tin ku drecha e kaya, ora bisa Bonaire Builders, nan ta laba man bisa ta OLB tin ku drecha e kaya.

Na e proyekto di APNA tin roi nan traha, sinembargo nan ta yen yen di tera, pues tur e awa ku mester pasa den e roi, ta keda para riba Kaya Tanki Matrimonio.  

Un petishon un bia mas na gobièrnu, pa porfabor drecha Kaya Tanki Matrimonio. Limpia e roinan, pa asina evitá ku awa ta keda na un sitio. No laga e kos keda solamente na palabra, ”Martis a skirbi den un karta rogando Pedro de Jongh.

Potrèt ta ilustrá parti di e situashon ora áwaseru kai den e área.

Situashon na Kaya Tanki Matrimonio 26 ora di yobida.
Share This
error: Content is protected !!