KRALENDIJK – E manifestashon trahadónan di BOPEC tabatin djabièrnè último no tabata kontra e kompania. E manifestashon tabata tin un meta i esaki pa mantené BOPEC habrí. USIBO ta kuminsá na gradisí e trahadónan di BOPEC pa e UNION ku nan a demonstrá djabièrnè último. Ya nos a deklará tur ku a apoyá den e marcha pasífiko aki komo heroé. E motibu ta ku nan tabata e ehèmpel bibu kon por usa nos derechonan fundamental humano ankrá den nos konstitushon den un forma sivilisá pero determiná pa logra un meta adelantá poné. E derecho di ta organisá den un sindikato tabatin un tinto históriko ora ku komunidat por a eksprenshá personal di staf i personal di labor huntu den UNION komo ruman marcha huntu pa un kousa esta TENE BOPEC HABRI pa nos di awe, pero tambe pa esnan di mañan. E derecho di manifestá den un forma pasífiko uni den un pensamentu i un meta a demonstrá di muchu mas efektivo ku usa violensia. Esaki ta hasi e trahadónan aun mas heroé ora ku nan a sakrifiká nan dia pa un kousa ku ta mas haltu ku esun di nan, esta tene BOPEC habri pa ekonomia di Boneiru. Tur hende por a tuma nota ku durante henter e marcha e lema tabata TENE BOPEC HABRI. Den patio di Bestuurscollege, Remy Ellis representando e staf a supliká gezaghèber komo tata di Boneiru pa huntu ku su gobièrnu hasi tur esfuerso pa TENE BOPEC HABRI. Mavis Abrahams presidente di USIBO a ekspresá lesando e MANIFESTO un mensahe, esta TENE BOPEC HABRI E damita yu di un trahadó di BOPEC a gradisi tur esfuerso hasí te awor pa TENE BOPEC HABRI i a pidi pa sigui hasi esfuerso pa TENE BOPEC HABRI pa nan generashon mañan tambe lo por bin gana nan pan di kada dia na BOPEC. Finalmente Gezaghèber a konfirmá ku nan intenshon komo gobièrnu ta pa TENE BOPEC HABRI. Pues un gesto noble di henter komunidat pa TENE E KOMPANIA HABRI. No por a skucha ningun zonido di e trahadónan en kontra di BOPEC. Pa tal rason tambe despues di e manifestason a hasi un yamada riba e trahadónan pa reanudá na trabou normalmente, lokual nan a hasi tambe. P’esei enfátikamente nos di USIBO i huntu ku FEDEBON i BPWU ta refutá i rechasá ku tabatin un akshon kontra BOPEC.

Share This
error: Content is protected !!