KRALENDIJK – Relashoná ku e karta ku a wòrdu publiká di un suidadano di bario Tanki Matrimonio, Herbert de Jongh doño di ‘Bonaire Builders’ a reakshoná tokante kontenido di e karta. Ta trata di e situashon den e área menshoná, kaminda spesialmente momentu di yobida ta kousa problema.

De Jongh a papia ku Radio Live 99.9 FM i el a splika bon klá ku ta trata di responsabilidat di gobièrnu di Boneiru pa drecha e kamindanan den e área di Tanki Matrimonio.

“Art B punto 6 ta pone bon klá ku e parti di ‘verhardering’ di kaya i entre otro ponementu di lus, ta responsabilidat di gobièrnu. E palabrashon ku tin entre ‘Bonaire Builders’ i gobièrnu di Boneiru ta ku ‘Bonaire Builders’ ta traha kas i e kaminda di tera momentu ku ta konstruí e kasnan. Gobièrnu ta pèrkurá pa e parti di asfaltamentu òf kaminda di betòn. Esaki mester ta bon klá pa e habitantenan ta na altura ku no ta responsabilidat di ‘Bonaire Builders’ pa asfalta kayanan den e área pa evitá entre otro molèster di awa ku ta keda na e sitio momentu di yobida,”Herbert de Jongh di ‘Bonaire Builders’ a menshoná.

El a papia tambe tokante e problema ku awa ta keda para na e sitio entre kaminda di asfalt i esun di tera. “Pa loke ta trata e situashon menshoná tambe ta responsabilidat di gobièrnu. Ta bon pa menshoná ku e situashon ku awa ta keda na e sitio, NO ta unu kreá pa e konstrukshon di kasnan na e tereno di ‘Tanki Matrimonio’. E situashon ya tabata eksistí. Kisas el a bira pió, esaki debí na e drechamentu di e kaminda di tera ku ta okashoná e problema. Ta trata di e tera ku ta poné pa drecha e kaminda kada temporada, a bira haltu, loke ta stroba e awa pa kore for di e sitio. Tin potrèt ku ta ilustrá e situashon di awa ku ta para na e sitio, esaki for di 2017, esta promé ku a inisiá ku e proyekto di ‘Tanki Matrimonio’,” de Jongh a bisa. Radio Live 99.9 tin e papelnan ku por mira loke ta e palabrashon ku tin entre gobièrnu di Boneiru i Bonaire Builders pa loke ta trata e proyekto di kasnan na ‘Tanki Matrimonio’. 

Potrèt saká 19 di sèptèmber 2017, e sitio unda kaminda di asfalt ta topa esun di tera i awa ta keda okashoná problema pa habitantenan den bisindario.
Share This
error: Content is protected !!