KRALENDIJK – Awe 27 di yüli USIBO por informá komunidat di Boneiru kompletu ku grasias na e akshonnan kontinuo di e sindikatonan, apoyá pa entre otro outoridatnan lokal, pero tambe danki na e kompanianan RDK, CRU, CUROIL i e ofisina di notario ku djabièrnè último un parti di e trahadónan di BOPEC a kobra nan salario di luna di yüli, miéntras ku den kurso di awe e sobránan lo kobra nan salario di yüli 2020.

Ta asina ku riba un petishon di 25 di yüni 2020 di e kompanianan RDK, CRU, CUROIL i e notario na OFAC pa alargá e lisensia, OFAC a bai di akuerdo pa alargá esaki te ku 31 di dézember 2020. Esaki a trese en todo kaso trankilidat bou di e trahadónan pa loke ta pago di e salarionan te ku dézèmber 2020. E alargamentu aki a bai bou di kondishonnan masha estrikto pa no violá ningun lei o sankshon di Merka kontra PDVSA,

Ku esaki USIBO ta komprondé tambe dikon e gerente di BOPEC no por a entregá nos ningun dokumento kaminda e ta firma ku nan lo a paga salario fin di luna di yüli i mas aleu. Simplemente pasobra den esaki BOPEC no ta partido. Algu ku a keda konfirmá tambe pa e sentensia di hues ku a rechasá e petishon di BOPEC pa e notario usa e fondonan riba e esrow-account.

Un biaha mas ku e alargamentu di e lisensia aki, trankilidat bou di e trahadónanta sigurá por lo pronto i pa esei USIBO ta felisitá e trahadónan pa nan union ku nan a demonstrá a pesar ku nan mester a soportá basta forsanan negativo, intimidashon represaya, hasta interno ku kier a bula e UNION aki. Mester trese dilanti tambe ku e alargamentu di e lisensia a solushoná temporalmente e asuntu di pago di salario pero no a solushoná ainda e problema di e seguridat di e terminal pa e por operá según e pèrmitnan nesesario. Manera ta konosí pa òktoberawor ILT a ordená pa hasi tur tanki bashí.

Den e aspekto aki e responsabilidat di inspekshon i kòntròl ta den man di gezaghèber konbiná ku e ministerio di asuntunan ekonómiko EZK di Ulanda pa pèrkurá ku e terminal ta den un estado di seguridat pa tantu medio-ambiente komo pa e empleadonan ku ta laborá diariamente na e terminal. I e aspekto aki tambe USIBO i e sindikatonan lo vigilá seriamente i di aserka, ya ku seguridat ta parti integral di e kondishonnan laboral di tur trahadó di BOPEC, manera esaki ta ankrá den e CAO, artikulo 44.

Tambe ainda USIBO no a mira e solushon di e embargonan(beslagnan) ku tin riba e kompania, miéntras e sankshonnan ketu bai ta na vigor. Den un boletin separá USIBO lo bin bèk riba e papel di Ulanda den esaki.

Por lo pronto USIBO huntu ku e dos sindikatonan lo sigui hasi tur esfuerso pa tene BOPEC habrí i ku mas lihé posibel e terminal por kuminsá i sigui ku su operashonnan normal ku ela bin ta hasiendo ya pa 45 aña kaba na benefisio i interes di kuponan di trabou en partikular i di e ekonomia di Boneiru en general.

AFBW

USIBO kier felisitá e sindikato AFBW ku e tremendo éksito di nan kampaña pa logra deskuentonan pa nan miembronan na diferente instansia i kompanianan riba nos isla. Sigur sigur e kampaña aki ta demonstrá na e trahadó/miembro ku e sindikato ta nifiká algu pe i su famia. Oumento di salario i mehorashon di kondishonnan di trabou sigur ta e meta prinsipal di un sindikato, pero e aspekto sosial, e aspekto di seguridat i higiena riba flur di trabou ta mesun importante. I e kampaña aki kaminda tin deskuentonan di 10 i te hasta 20% ta nifkiá un alivio pa chikí ku e por ta. Pa duna un ehèmpel si un trahadó miembro di AFBW ta kumpra mensualmente Usd. 300 na komestibel den un supermerkado, ku e kampaña aki e ta spar USd. 30 ku e por uza na otro obligashonan den su famia. Nos a komprondé tambe ku e sindikato ta den e proseso pa modernisá su statutonan ku ta data for di aña 1966 i ku e adaptashon aki naturalmente ta den e konteksto pa enfrentá e retonan nobo ku sindikalismo tin ku enfrentá pa ku e merkado laboral. USIBO ta spera ku e otro sindikatonan lo por tuma komo ehèmpel e inisiativa di AFBW i den un forma kreativo nan tambe bin ku ideanan pa duna sindikalismo e balor agregá ku e meresé pa e klase trahadó. USIBO ta spera tambe ku trahadónan tambe ta kuminsá mira i apresiá e balor di sindikalismo pa nan i ta duna un man den esaki pa rehobenesé liderato sindikal na Boneiru. Ku sindikalismo fuerte BOS di trahadó ta konta.

Share This
error: Content is protected !!