KRALENDIJK – E ekipo di futbòl s.v. Vespo di Rincon, djabièrnè último den presensia di un bon públiko den Stadion di Playa den oranan di anochi, ta manda s.v. Juventus di Antriòl/Playa Pabou kas ku skor mínimo di 1-0, esaki fo’i dje torneo Kopa FFB selebrando su 60 aniversario.
Un total di 847 fanátiko a paga pa mira e partido, di kua 605 adulto, 175 mucha i 67 fanátiko riba 60 aña.


Tabata un partido ku no a konosé gol den su promé mitar, e partido a parti na dos pa sosiegu reglamentario sin gol, 0-0 pues.
E promé mitar Juventus a hunga ku bientu na fabor i Vespo ku bientu kontra.

Tabata na di 79 minüt di e partido, e di dos mitar pues, ku Raydolf Felix ku tremendo tiru totalmente fuera di alkanse di e portero, ta anotá e úniko gol di e partido, loke tabata sufisiente tambe pa bai ku e viktoria i eliminá Juventus fo’i dje torneo estilo “dal saka”.
Vespo ku e viktoria aki ta pasa pa semifinal di e torneo djárason awó 29 di yüli 2020 kontra e ekipo di Estrellas di Nort Saliña, di kua e ganador ta pasa pa final.


E partido djabièrnè último sigur tabata otro tremendo partido, un partido bon bishitá, loke ta proba ku e fanátiko di e deporte Rei Futbòl tabata sinti falta di su futbòl den Stadion Kralendijk.
Tur e weganan di e torneo te ku awó, tabata bon bishitá.

Riba potrètnan e rèfrinan ku a dirigí e partido. ekiponan, outor di e gol di e partido, tambe un bista di e gran públiko ku a presensiá e partido.

Share This
error: Content is protected !!