KRALENDIJK – Sindikato AFBW despues di 54 aña, awor bou di presidensia di Cherrel Kwidama, a firma statutonan nobo. E presidente nobo a primintí su direktiva ku despues di 6 luna lo tin kambionan den e sindikato i nos ta pará na 6 luna despues. Algun trabou ku a wòrdu hasi ta entre otro renobashon di e kas sindikal na kaya Korona, réstrukturashon di shòpstiwertnan i a traha riba kambio di statuto. E akto históriko aki a tuma lugá djamars atardi na ofesina di notario Aniek Schouten. Roderick Groenman, remplasando notario Schouten a firma e statutonan den presensia di miembronan di direktiva di AFBW, koleganan sindikal di USIBO i Prensa. Den e statuto nobo i adaptá ku a wòrdu firmá, a amplia entre otro e kontenido ku un kantidat di 20 punto aserka ku ta forma un total di 36 artíkulo i a amplia tambe posiblidat ku trahadónan di mas sektor por afiliá na AFBW. Aktualmente AFBW ta konta ku un total di masomenos 400 miembro i vishon di e presidente nobo ta pa yega un total di 600 miembro. Sr. Ewald Abdul, komo promé presidente di e sindikato ku tabata pará na kuna di e promé statutonan 54 aña pasá tambe tabata presente pa e akto importante aki.

Share This
error: Content is protected !!