KRALENDIJK – E hóben Ashier Martines a stòp ku su karera komo arbitro aki na Boneiru. Esaki ta loke ku el a ekspresá den un kombersashon ku Radio Live99.9FM. Martines su malkontentu ta ku e tin 3 aña konsekutivo ku no ta wòrdu poné riba skema pa flùit final di kampionato senior òf torneonan ku ta wòrdu organisá. E ta sinti ku esaki no ta hustu komo ku no ta duna rèfrinan yòng i ku eksperensia e oportunidat pa flùit partidonan final di futbòl. E ta un rèfri yòn ku un karera largu su dilanti i un di e mihónan ku a pasá su èksamen komo rèfri. El a demostrá su kalidat komo rèfri i ta kapasitá pa flùit un partido final. Pero ta wòrdu wantá abou pa esnan ku ta kabes di rèfrinan. Tur final di torneo òf kampeonato ta mesun rèfrinan ta wòrdu apuntá pa flùit wega.

Segun Martines el a demostrá su kalidat riba tereno i ta haña ku mester duna hóben nan e oportunidat pa flùit un partido final. E no tin problema tampoko pa ta rèfri di mesa òf hues di liña durante un partido final.
Pero no por ta posibel ku ta hasi yamada i roga pa hóben nan bira rèfri i ta trata hóben nan di e forma aki. Esaki ta di lamentá mirando ku tin skarsedat di rèfri kaba riba nos isla. Na final di nos kombersashon, Martines a duna di konosé ku e lo sigui duna su aporte komo arbitro pa kampionato hubenil te ora ku maneho di rèfrinan kambia di mentalidat.

FUENTE: Live99.9FM

Share This
error: Content is protected !!