KRALENDIJK – Despues di a eliminá S.V. Estrellas di Nort Saliña ku skor di 2-1 den partido ku prolongashon den e último semifinal djárason último den oranan di anochi den Stadion di Playa, s.v. Vespo di Rincon, ta drenta final di e torneo Kopa FFB 2020 ku ta tuma lugá mañan anochi 8’or kontra S.V. Young Boys di Nort Saliña.

E último partido semifinal di e torneo te ku awó faltando e final mañan anochi, a kibra “record” pa loke ta asistensia na e partidonan di e torneo ku tabata bon bishitá. Un total di 1274 fanátiko a paga pa mira e partido, di kua 932 adulto, 258 mucha i 84 fanátiko 60+.


Tabata un partido ku den promé mitar di e partido, s.v. Estrellas na di 23 minüt di e partido ta bai dilanti 1-0 ku gol di Sigrel Burnet. Na di 26 minüt Jmeson Piard ta hinka e gol diempate pa s.v. Vespo hasi e partido 1-1, skor tambe ku e partido a parti na dos kuné pa sosiegu reglamentario di e partido. Si dos mitar e ekiponan a subi tereno buskando e gol pa bai den bentaha i no ta logra. E partido ta finalisá 1-1 i mester a bai den prolongashon di 2×15 minüt pa yega na un ganador. Den e prolongashon, na di 100 minüt di e partido, Christopher Papa Isenia ku tremendo tiru liber fuera di alkanse di e portero, ta hasi e partido 2-1 na fabor di s.v. Vespo.
Despues di esaki no tabatin novedat i Vespo ta gana e partido 2-1 i pasa pa final mañan anochi 8’or kontra s.v. Young Boys den Stadion di Playa.
E partido aki tambe ta premirá ku esaki lo hala basta hende, mas ku djárason último, kibrando asina tambe e ”record” di tur e partidonan di e torneo.


Mañan anochi 7’or lo kuminsá tambe ku e seremonia di e klousura di e torneo 60 aña di FFB ku ta nos federashon di futbòl di Boneiru. Lo tin tambe e diferente diskursonan, entrega di rekuerdonan i na final di e partido entrega di Kopa FFB 2020. Tambe lo tin animashon musikal di Ritmiko Timon Krioyo.


Riba potrètnan e timnan di S.V. Vespo i S.V. Estrellas, tambe outornan di e golnan di e partido.

Share This
error: Content is protected !!