KRALENDIJK – Moveshon nan den farandula di Boneiru ta sigui kayente. E último siman nan aki tin diferente kombersashon a tuma lugá pa formashon di un banda nobo riba nos isla i manera ta konosí ya tin dos persona a informá ku nan no ta forma parti mas di e banda enkuestion. Ta trata aki di e kantante Jurnick Clarenda i e trompetista Philip Bernabela. Awor a drenta e informe na redakshon di Radio Live99.9FM ku un di e pilánan den frònt di e agrupashon musikal Fenty Music, Gerald Alberto tambe a entregá su karta di retiro na maneho di e banda nèt despues di un presentashon durante ‘Taste of Bonaire’. Esaki ta otro gòlpi pa e banda. Gerald ta un di e hóbennan ku tabata tei for di inisio i a krese komo kantante den Fenty Music. Radio Live99.9FM a aserká Janou Troeman ku ta forma parti di maneho di Fenty Music ku e pregunta ku ta bèrdat nan a risibí karta di retiro di Gerald despues di e presentashon den kaya i su kontesta tabata: “Esei ta kuadra, Gerald a entregá na mi persona su karta di retiro. Esei a sosodé algun ratu pasá. Nos a kombersa i Gerald ta habrí pa seré bunita”.

Un di e personanan ku ta hungando un ròl importante den formashon di e banda nobo ta e Boneriano Jairo Evertsz. Den siman tras di lomba te asta Dwight Leoneta tabata na Boneiru pa duna un man na ensayonan ku ya a ranka sali pa lokual ta e banda nobo.

Riba un video i pòtrèt ku ta kore rònt riba medio sosial por mira durante un ensayo di e banda nobo diferente kara konosí i algun persona ku ta formando parti ahinda di Fenty Music. Pues lo no ta un sorpresa ku lo bai tin mas miembro di tripulashon di e barku ku lo bandoná esaki un ora pa otro.

Pòtrèt ku ta kore rònt i ku ta bisa hopi……….
Share This
error: Content is protected !!