KRALENDIJK – Algun pasahero ku wikènt tras di lomba a hasi uso di e servisio di e kompania di biahe EZ-AIR, a aserká Radio Live99.9FM i konta di un situashon fastioso ku a sosodé ku nan riba un buelo for di Aruba via Kòrsou pa Boneiru. “EZ-Air ta kontinuá ku e mal servisio meskos tabata e kaso ku otro kompanianan di biahe. Djadumingu tras di lomba nos a sali for di Aruba pasa via Kòrsou i yega Boneiru komo destinashon final. For di Aruba e buelo a sali na ora segun e skema di buelo di e kompania. Momentu ku nos a yega Kòrsou, nos mester a baha for di e avion pa pasa di tránsito i subi un otro avion i biaha pa Boneiru. Na Aruba i Kòrsou tabatin aktividatnan grandi den wikènt tras di lomba kaminda diferente Boneriano a bai. “Nos a bula di Kòrsou pa Boneiru den un avion sin èrko. Un kayente insoportabel den e avion, komo si fuera nos tabata den kandela. Tabatin hende di edat avansá riba e buelo. Kiko lo a pasa si e hendenan aki a bira malu abordo? Ta nan sèn di penshon a usa pa tene e kompania EZ–Air su kabes riba awa. Pasaheronan tabata grita ku mester tin un kandela riba e avion debí na e kayente insoportabel. Nos pregunta ta: Dikon mester a kambia di avion pa un ku no tin èrko? Pues ta trata nos di Boneiru meskos ku tabata den pasado ku otro kompania di biahe? Nos ta gradisí Dios ku nos a yega Boneiru sin algu a sosodé. Te asta stulnan den e avion tabata birando hopi kayente. Na yegada na Boneiru nos a hasi pregunta na e piloto kon e kos aki por ta posibel i el a djis hari sin bisa nada. E mesun avion a sali rumbo pa Kòrsou mas despues. E kos aki no ta hustu, “e biaheronan hopi rabia ku trato di e kompania a menshoná. 

Share This
error: Content is protected !!