KRALENDIJK – E klup di futbòl di s.v. Vespo di Rincon, djabièrnè último den presensia di mas di 2 mil fanátiko ku a paga pa mira e partido, a gana di e hóbennan di Young Boys di Nort Saliña ku skor di 3-1 i titulá kampion di torneo di futbòl 60 aña di FFB, Kopa FFB 2020.

Un total di 1909 fanátiko a paga pa mira e partido, di kua 1278 adulto, 545 mucha i 86 fanátiko riba 60 aña. Ku esaki manera tabata di spera i antisipá, a kibra tambe e “record” di e torneo komo e partido ku a hala mas fanátiko ku a paga i mira e partido. Aparte di esnan ku a paga pa mira e partido, tabatin sigur mas di 2 mil hende ku a presensiá e partido si konta tur e invitadonan i otronan ku no a paga pa mira e partido.


Pa loke ta e partido riba su mes, s.v. Vespo na di 3 minüt di e partido ta bai dilanti 1-0 ku gol di Jameson Piard. Na di 14 minüt di e partido, Rowel Frans di Young Boys pa medio di pinalti ta empatá e partido 1-1. Na di 19 minüt di e partido, pa medio di e di dos pinalti di e partido, Mayron Rombley hasi e partido 2-1 pa Vespo. Ku Vespo dilanti 2-1, e partido ta parti na dos pa sosiegu reglamentario. Di dos mitar di e partido Young Boys ta sali buska e gol pa empatá e partido i no ta logra. Na di 65 minüt di e partido, Elionard Janga ta hasi e partido 3-1 pa Vespo i ta seya tambe e viktoria di Vespo.

Ku e resultado aki pues, s.v. Vespo ta titulá kampion di e torneo, e ekipo di Young Boys ta keda di dos lugá o sea supkampion di e torneo Kopa 60 Aña FFB. Tabata un partido ku e hóbennan di Young Boys a ataká hopi i tabata yega hopi serka gol pero no ta logra finalisá e atakenan den gol i ta kai vensí. E gran públiko ku a presensiá e partido a biba ku e partido fo’i kuminsamentu te final di e partido.


Un bon komportashon tambe di e fanatikada ku a presensiá e partido aki.
Ku esaki e fanátikada ku a presensiá e partido, por bisa ku e fanatika di e depore rei futbòl a haña e kaminda bèk pa stadion pa mira partidonan di futbòl di FFB ku ta sigui fin di e luna aki. Dia 28 di e luna aki kampionato 2020-2021 di nos isla ta kuminsá den Stadion Kralendijk na Playa.


Riba pòtrètnan e ekipo di rèfri ku Bryan Virginie ku a dirigí e partido, ku asistensia di Amos Melaan i Geoffrey Angela na banda i ku Arelis Mercera na mesa, e ekiponan, tambe parti di un bista di e gran públiko ku a presensiá e partido.

Share This
error: Content is protected !!