KRALENDIJK – Djarason awor e un grupo di studiante ta sali pa Hulanda. Ta trata di 35 studiante. Radio Live 99.9 FM a papia ku Jefferson Coffie di RCN su departamentu di ‘Studiefinanciering’, kende ta e persona ku ta atendé ku entre otro e parti di bai mentu den eksterior di studiantenan. “Djarason benidero 35 hóben ta bai studia na Hulanda. Aparte di Hulanda tin studiante ta bai Aruba, Kòrsou i Merka. Loke ta e kaso e aña aki mester tene kuenta kiko ta e regla ku kada pais tin, relashoná ku e situashon di COVID-19.

Preparashon di e studiantenan a bai bon, esaki awor for di na skol, i ta algun kos chikitu ta andando e dia nan aki, promé nan subi avion pa eksterior. E hóben studiante ta liber pa skohe kiko e ta deseá di studia i na unda e ta bai kontinuá. Nos a súplikanan pa buska informashon, kiko e skol ta eksigí. Mayoria di skol na Hulanda a bisa e studiantenan ku ta posibel pa hasi e lès ‘online’, sinembargo debí na e diferensia di ora, ta mihó pa e studiante ta na Hulanda. Tin bia e studiante mester ta presente na skol, i esei ta importante pa e ta na Hulanda. Na Hulanda e grupo TuranGoeloe ta topa i atendé ku e studiantenan, pa asina nan risibí e guia nesesario. Entre otro nan ta den kontakto ku e studiantenan i e skol, i informá nos na Boneiru kon tur kos ta kana aya na Hulanda.

Djarason tur studiante mester ta 3 ora promé ku e buelo pa Hulanda, ku ta sali 10 minüt pasa di 5’or di atardi. E aña aki a opta pa e studiantenan biaha nan so, esaki entre otro debí na e situashon aktual tokante e problema di COVID-19. Nos ta deseá nan éksito, hasi bon uso di e oportunidat i regresá Boneiru momentu ku finalisá e estudio pa yuda ku desaroyo di e isla,”Coffie a bisa. 

Share This
error: Content is protected !!