KRALENDIJK – E konosido George ‘Kultura’ Thode tabatin un anochi di informashon, kaminda el a elaborá riba diferente tópiko. Entre otro tokante situashon na Boneiru kon bon òf no bon prepará e isla ta pa un orkan,  tokante kos straño ku a sosodé na Boneiru i investigashon ku ta tumando lugá. ‘Kultura’ a menshoná ku ta hasiendo investigashon pa loke ta trata e suseso ku a sosodé kaminda e persona a pèrdè pega ku kura di BOPEC. E investigashon ya ta den su fase final. Kultura a papia na nòmber di e organisashon ku e tin ku ta karga e nòmber Kanadó di Mondi–‘Kadimo’. E organisashon a keda forma na 1983. Kultura:“Entre 2020 pa 2025 pa poko un orkan lo pasa riba Boneiru. Tin almanan ku algun persona entre nan ami, ku ta señalá hòmbu grandi, i nan ta simplemente protehá sierto área. Ta mira esakinan na entre otro Slaagbaai i Lac.
Mi a hasi investigashon pa un temporada sintá den santana na Rincon. Tin kurpanan spiritual tabata kana pasa mi dilanti i bira kara otro banda pa mi no rekonosé nan. Mi a pone un spil otro banda i asina mi a rekonosé e spiritu i señalá kua graf el a drenta. Esaki i hopi mas, ”Kultura a konta.   

Promé ku el a sera e anochi el a menshoná ku ‘Kadimo’ ta bai hasi investigashon den ofisina di gezaghèber Edison Rijna.  

“Mi tin un amigu ta bini for di eksterior, pa ta eksakto Merka, ku entre otro kámara hopi sofistiká pa detektá kosnan, laga nos bisa ku no ta normal riba planeta tera. E promé kaminda ku nos ta bai hasi investigashon ta na  ofisina kaminda gezaghèber Edison Rijna ta sinta. A konstatá ku tin pia di hende ta baha i subi trapi den e edifisio, i a yega tempu a detektá kiko eksaktamente ta sosodé. No solamente e edifisio kaminda gezaghèber kos straño ta sosodé. Meskos ta e kaso na Pasangran i na diferente otro sitio na Boneiru. Otro sitio ku ta hopi spoki manera ta bisa, ta plantashi Guatemala na kaminda di Lagun,”Kultura a finalisá bisando. Durante e anochi el a menshoná ku e tin kaha di morto na kas i durante fin di siman, manera un hende ta drumi relaha den hamaka, Kultura ta drumi den kai morto sin miedu. 

Share This
error: Content is protected !!