KRALENDIJK – Djasabra awó 8 ougùstùs ta bai kuminsá ku e promé treinen, e promé evento di Self-Defense pa mucha di 6 te ku 12 aña, esaki di 10or mainta pa 12or di mèrdia na Jeugdhuis Jong Bonaire. Esaki ta dirigí riba muchanan di 6 pa 12 aña ku na skol tin problema ku “Bullying” ku ta tentamentu, tantu riba e parti físiko komo tambe mental, pèstmentu di e muchanan na skol, loke lo por i ta stroba e mucha su desaroyo. Pa e grupo aki a traha un pakete hopi interesante, segun instruktor sr. William Evertsz.

E programa no ta solamente pa e mucha, pero e mucha kompañá pa un mayor ku ta mira kiko e mucha ta siña durante e treinen, kon pa dil ku tipo di problemanan asina na skol i riba kaya. Hopi bia un mucha ku ta hañé ku tipo di problemanan asina ta dal sera, nan no ke siña mas, nan no ke bai skol mas ya ku ta tenta nan na skol, loke ta stroba e mucha di siña, stroba su desaroyo. Ku e programa aki ku un instruktor sertifiká ku ta sr. William Evertsz, e mucha ta siña kon pa dil ku tipo di problemanan asina.

E programa o sea treinen no ta siña e mucha bringa, pero si ta siña e mucha kon pa dil ku esaki i kon ta sali fo’i djesaki si e hañé ku un situashon asina.
Pa e muchanan di 6 pa 12 aña a traha un pakete hopi interesante.
Importante ta pa e mucha momentu ku e yega na un lugá, pa e sa kon e ta dil, kon ta interpretá e sentimentu etc. Ta siña nan ku unda ku nan yega, kon ta kapta e moveshon, e feeling. Tambe nan ta siña protehá nan zona personal, siña bisa nò, siña para hende i bisa te akinan awó. Importante pa nan siña nan norma i balor, respetá nan mes mes, ken nan mes ta.

E ta interesante pa e mucha, loke ta yuda e mucha sali fo’i kualke situashon ku ta strob’é den su desaroyo. E treinen di Self-Defense no ta solamente pa e mucha, sino tambe pa tur hende, e no tin edat. Tur hende por siña kon pa defendé su mes den kualke situashon ku e lo por hañé kuné o ku lo por presentá. Pa inskripshon o mas informashon por tuma kontakto ku William na +599 777-2095

Share This
error: Content is protected !!