KRALENDIJK – Claris St Jago – Trinidad hefe di merkadeo i komunikashon di Selibon N.V. a papia ku radio Live 99.9 FM tokante trabounan ku Selibon ta ehersé i mas. “Selibon ta hasiendo trabounan di limpiesa den Antriol pariba i debí na selebrashon di bario Tera kòrá, a opta pa bai hasi limpiesa den Tera kora. Momentu ku terminá aya ta kontinuá den Antriol pariba i despues den e bario parti pabou. Seguidamente nos ta bai bario Nort di Saliña. Nos ta kontentu kon Bonerianonan ta biba ku e trabounan ku Selibon ta hasi. Nos ta haña bon koperashon, kaminda hende ta yama i bisa sierto áreanan ku a kaba hasi limpi, tin persona ta bolbe depositá shushi na e área. Esaki a sosodé entre otro den bario Mexico.

Selibon ta ofresé tur wikènt, esta djasabra i djadumingu pa por hiba i tira shushi grátis na Landfill. Ta ofresé tambe e parti di rekohé shushi èkstra ku e suidadano tin na kas. Por yama na ofisina di Selibon un dia promé ku e trùk ta pasa den bo bario pa rekohé shushi i Selibon ta manda un ekipo spesial pa atendé ku e shushi na bo kas. Nos huntu tin ku traha pa tene Boneiru limpi. Pa loke ta trata e bario di Rincon por hasi uso di Morotin, ku ta habri djaluna pa djabièrnè 9:30 pa 7’or di anochi, djasabra ta entre 9:30 pa 5:30 i djadumingu 10’or pa 3’or di mèrdia. Na lagun por depositá shushi di 7’or pa 4’or durante siman i djasabra 8’or pa 4’or i djadumingu 8’or pa 1’or,” St Jago-Trenidad a bisa. Ta pidi tambe pa laga Morotin pa habitantenan di Rincon i tira kosnan ku mester prosesá, manera produkto kaduká na Lagun, kaminda por prosesá nan rápido.   

Share This
error: Content is protected !!