KRALENDIJK – Ayera djarason un kantidat di mas ku 30 hóben a biaha pa Hulanda pa kontinuá nan studio. Reportero nan di Radio Live 99.9 FM tabata na aeropuerto Flamingo, pa tuma nota di e momentu ku e studiantenan tabata pendiente pa subi e avion di KLM rumbo Schiphol. Entre otro tabata presente Jefferson Coffie di e departamentu di RCN Studiefinanciering i Jennifer Pocornie-Martis, konsehero di diputado Nina den Heyer, kende a duna e studiantenan e palabranan di motivashon promé ku nan a bandoná Boneiru. E avion di KLM a lanta buelo poko despues di 5’or di atardi, lagando hopi famia ku un doló na kurason. Doló debí ku nan yu òf un miembro di nan famia ta bai den eksterior. Importante ta ku nan ta bai pa un bon meta, i manera a keda menshoná, pa momentu nan terminá, regresá i duna un man na desaroyo di nos dushi isla di Boneiru. Na nòmber di Radio Live 99.9 FM ta bai deseonan di éksito pa tur studiante, i ku nan probechá di e oportunidat pa kapta mas tantu posibel i den futuro implementá nan konosementu pa desaroyo di Boneiru. 

Share This
error: Content is protected !!