KRALENDIJK – Suidadano krítiko Arthur Sealy a emití un komunikado kaminda e ta papia di e direktor nobo na e departamentu di R&O ku tin mester di un bon introdukshon na Boneiru, pa siña konosé e kultura di R&O ku ta e fundeshi di historia di R&O ku no tin un bon nòmber. E direktor ku ta bai sin duda a laga un historia atras. Ta obligashon di OLB pa publiká detayadamente te kon leu e direktor ku ta bai a kumpli ku e tareanan stipulá den e Akuerdo di Atministrashon. Sigur tin hende kontentu ku e direktor a bai i grupo di benefisiado ku no ta kontentu. E direktor nobo lo mester kuminsá gana konfiansa di pueblo. Aparte di esei e direktor nobo ta obligá di komprondé interes di e kapitan nan di industria, polítikonan, su ámtenarnan ku tin relashon ku sierto polítiko i di su koleganan direktor tambe ku nan interes personal. Ta un ret di interes ta eksistí ku ta sumamente difísil pa sa ken ta aliado di ken. Sea konsiente ku a skohe bo riba bo puntonan debil pa por manipulá bo. Bo puntonan fuerte lo no yuda bo pa motibu ku bo no por bringa e muraya fuerte aki. Drechamentu di kareteranan di Boneiru i otorgamentu di tereno ta kosnan polítiko pa gana voto. Chèk e lista di espera pa un tereno i lo bo ripará kon e wega ta. Ken si ken nò. E promé paso ku bo ta obligá di tuma ta, pa riba promé dia di trabou i no despues di algun luna, tene un reunion ku bo ámtenarnan i splika nan bon kla ku abo ta hefe i no ta tolerá e aktitut di hiba i trese na diputado i kometé chanchuyo ku tereno. Lo bo ripará ku no ta bini reakshon i tòg e redashi tras di bo lomba lo tuma lugá. Komo eks dosente mi ta duna bo un tep ku ta funshoná. No tene miedu pa eliminá e hasidónan di redu i laga e kaso bai serka diputado i sindikato. Sera un pakto ku e lider informal den e grupo. Den komunidat tin persona ku no ta afiliá nan niun grupo polítiko, pero ku tin influensia den komunidat ku por yuda bo. Mi ta regalá bo un vèrekeiker pa bo buska nan. Ami ta un di e proménan ku di kurason ta deseá bo éksito. 

Share This
error: Content is protected !!