KRALENDIJK – E klínika di futbòl di KNVB i FFB siman pasá tabata unu sumamente eksitoso ku partisipashon di mas di 100 mucha huntu ku tur e “coach”nan ku tabata enbolbí ku esaki.
E klínika di un siman a tuma lugá den Stadion Kralendijk na Playa.
Djabièrnè tardi tabatin klousura di e klínika ku algun partido di futbòl entré e muchanan ku a partisipá, di kua na final a premia dos di e muchanan ku a destaká ku mas puntuashon durante e klínika.
Di akuerdo ku e informashonnan ofisial relashoná ku e klínika, FFB huntu ku KNVB World Coaches a organisá un klínika di futbòl kompletamente grátis pa nos futuro futbolistanan di U9 te ku U13 di Boneiru.
E klínika tabatin komo funshon pa e muchanan dibertí pero tambe pa nos “coach”nan haña e oportunidad pa nan prepará pa nan Concacaf C i D-License.
Djabièrnè ku tabata último dia di e klínika, a sera esaki ku un torneo di futbòl.
Kada hungadó por a skor punto individual pa asina sali e ganador apsoluto.
Den kategoria U9 e ganador apsoluto a resultá di ta Zion Lourens.
Den kategoria U11/13 e ganador apsoluto a resultá di ta Jafet Vlijt, ámbos a haña un regalu chikí pa bai kas kuné.
Por último ta yama un danki na FFB, KNVB i tambe Bondigro ku tur a duna di nan parti pa a hasi e futbol kamp aki un gran éksito.
Na final di kamp tabata presente diputado di deporte sr. James Kroon ku tabata enkargá tambe ku parti di premiashon di e muchanan ku a destaká durante e klínika, esaki huntu ku e presidente di FFB, sr. Luti Balentin.
Di parti KNVB pa e kurso ta na Boneiru sr. Bert Zuurman di KNVB World Coaches.
Riba potrètnan algun bista di e weganan di e torneo, “coach”nan huntu ku Bert Zuurman di KNVB, Luti Balentin presidente di FFB, diputado di deporte sr. James Kroon i tambe e premiashon di e dos muchanan ku a destaká i keda premiá.

Share This
error: Content is protected !!