KRALENDIJK – Resientemente un suidadano a manda informashon i algun potrèt di kantidat di shushi tirá den mondi. Ta trata di shushi den e área patras di Amboina ku último tempu ta hopi usá pa tiramentu di shushi di forma ilegal. Algun luna pasá Selibon N.V. a hasi tur esfuerso pa limpia e área. Djis algun dia despues, deskonosí, òf  deskonosínan a kontinuá ku tiramentu di shushi den e área. Ta trata di e área patras di bario Amboina riba e kaminda pa bai e tereno di El Tigre Winklaar kaminda ántes tabata saka Greis, i den bisindario. Ta tirando shushi inkorektamente. Ta bai un súplika fuerte na tur esnan ku ta hasi e akto nan ariba menshoná, pa stòp ku esaki. Loke nan ta hasi ta kousa sushedat na sitio no apropiá, ku tur e konsekuensia. Selibon N.V. a amplia su servisio, kaminda e suidadano por depositá shushi pòrnada tur wikènt, esta djasabra i djadumingu na Landfill. Ta ofresé tambe e parti di rekohé shushi èkstra ku e suidadano tin na kas. Por yama na ofisina di Selibon un dia promé ku e trùk ta pasa den bo bario pa rekohé shushi i Selibon ta manda un ekipo spesial pa atendé ku e shushi na bo kas. Pues no tin motibu pa tira shushi den bario. Nos huntu tin ku traha pa tene Boneiru limpi. Riba potrèt un parti di e porkeria ku antisosialnan ta tira den e área patras di bario Amboina.       

 

Share This
error: Content is protected !!