KRALENDIJK – Dos hungadó klave di e kampionnan di s.v. Real Rincon ku nos a topa kuné fin di siman pasá durante torneo di sòftbòl di Liga Si Nos Ke Nos Por na Jossy Boekhoudt Ballpark, e hungadónan Terrence i Robert Frans, na nòmber di tur hungadó di s.v. Real Rincon, ta pidi e fanatikada di e klup kampion aki, pa keda trankil ya ku nada no a pasa, s.v. Real Rincon ta keda s.v. Real Rincon. Hopi hende lo por ta intrankil ya ku s.v. Real Rincon no a logra yega final di Kopa 60 Aña FFB, di kua s.v. Vespo ku ta otro klup di futbòl di Rincon a titulá kampion i Young Boys supkampion.
E hungadónan ta pidi nan fanátikonan keda trankil ya ku s.v. Real Rincon t’ei i ta preparando fuertemente pa kampionato ku ta kuminsá fin di e luna aki, pa ta mas eksakto dia 28 di e luna aki.
S.V. Real Rincon den e torneo Kopa 60 Aña FFB, a hunga solamente un partido, pèrdè i kai afó den un torneo estilo “dal saka”.
Hopi hende no a spera ku e kampionnan a kai afó dje torneo.
E hungadónan ta pidi e fanatikada di e s.v. Real Rincon i pueblo di Boneiru, pa keda trankil ya ku nada no a pasa i no ta pasando tampoko ku e klup di futbòl aki.
S.V. Real Rincon t’ei kompleto pa ku kampionato dje temporada 2020-2021.
Riba potrèt Terrence Frans i Robert Frans, dos hungadó klave di s.v. Rincon djasabra ultimo na Jossy Boekoudt Ballpark durante torneo djasabra ultimo.

Share This
error: Content is protected !!