Willemstad – Raymond Gradus, presidente di e tres Kolegionan di supervishon finansiero (Cft), resientemente a hasi un bishita na Banko di Kuminda di Kòrsou (Voedselbank Curaçao). Ei el a risibí di Stacia Illidge, sekretario di e fundashon, informashon tokante e struktura di e inisiativa sosial aki ku ta duna yudansa na miles di famia for di komienso di e krísis pa motibu di e vírùs di COVID-19. For di aprel 2020 ya a parti mas ku 40.000 pakete di kuminda. Tambe el a haña informashon tokante di e donatùrnan ku pa medio di nan kontribushon finansiero ta hasi e forma di ayudo aki poibel. Tambe a konta Gradus tokante e kompromiso ku tur boluntario ta desplegá tur siman riba diferente manera pa por finalisá tur trabou nesesario.

Raymond Gradus ta hasi un bishita informal na Kòrsou, kaminda durante di un siman largu e ta tuma nota personalmente di e desaroyonan lokal i ta hiba kòmbersashon informal ku vários instansia i persona. Originalmente e intenshon tabata pa bishitá otro paisnan Karibense den Reino tambe, pero finalmente esaki no a resultá posibel. E bishita regular di henter e Kolegio na e paisnan, kual tabata planeá pa tuma lugá den yüni, tambe a keda kanselá; e próksimo biahe ta planeá pa tuma lugá na òktober.

Share This
error: Content is protected !!