KRALENDIJK – Claris St Jago – Trinidad hefe di merkadeo i komunikashon di Selibon N.V., a papia ku Radio Live 99.9 FM tokante situashon, awor ku e problema di COVID-19. “Selibon ta den e proseso di normal nobo. Empleadonan di Selibon a kontinuá tur momentu 100 porshento ku nan labor. Pa e motibu aki e kompania a perkurá pa tur trahadó risibí loke ta nesesario pa atendé ku shushi den e temporada ku e problema di COVID-19. A hasi hopi kambio i a duna treinen spesial pa tur empleado. E parti di higiena tambe ta pone hopi atenshon riba dje pa evitá ku trahadó ta aktua inkorekto kon atendé ku e shushi. Tin personal bon entrená kon atendé ku shushi ku ta bin for di hospital i sitionan di karentena relashoná ku tèst di COVID-19.

Morotin ta un proyekto ku ta andando for di 2019. Tin hopi atenshon pa Morotin i e tin orario nobo aktualmente. Tin personal di Selibon pa dirigí kon atendé ku shushi na e sitio. E parti di separá shushi ta hopi importante. Na kaya Trinitaria tambe tin un sitio pa depositá glas, bleki, papel i karton. Solamente shushi gròf ta sugerí pa hiba esaki Lagun. Lo tin un preis spesial pa esnan ku kore for di Rincon bai te Lagun. Nos ta konsiente ku den oranan di atardi i anochi tin trùk i pikòp for di Playa ta bai Morotin pa depositá shushi. No bai Morotin. Tira bo shushi na e sitio mas serka di e área ku bo ta. E parti di Morotin pa loke ta trata e parti di zeta ta kana bon. Aparte di karton, ta manda zeta tambe pa eksterior. Otro kos ta si tin hende ku a yena formulario den pasado pa Selibon pasa i rekohé outo bieu na kas, por fabor tuma kontakto un bia mas ku Selibon. E idea ta pa saka mas tantu outo bieu for di den barionan na Boneiru,” Trinidad a bisa Radio Live 99.9 FM. 

Share This
error: Content is protected !!