Kralendijk – Djasabra último a tuma lugá apertura ofisial di ‘Pastoral Social Cáritas Boneiru’, Un servisio di Amor. Esaki lo ta e sede di Cáritas Boneiru situá na kaya Papa Cornes 47 den e bario di Antriol. Cáritas ta un organisashon ku ta hasi trabounan di karidat, trahando paketenan pa hendenan ku mas tin mester den nos komunidat. A inisiá e momentu ku orashon pa medio di pader vikario Santiago Malagon, den presensia di tur presente i otro padernan katóliko. A bendishoná tur presente i despues di a dirigí algun palabra a kontinuá ku kòrtamentu di sinta.  

Seguidamente paden di e edifisio a papia pa medio di yamada di telefon obispu Luis Antonio Secco. El a menshoná ku e tei pa yuda esnan den nesesidat i a hasi orashon i pa medio di spiker, i tur presente a siguié.   

Despues a papia Pader Ivan Dario Perez, kende a bisa ku e ta duna honor na esnan ku tabata tras di e proyekto ku awe ta un realidat. Ta trata di Marugia Janga i Raul Perez Gomez. Marugia Janga a ekspresá kon kontentu e ta awor ku a finalisá e meta di e edifisio. Nos ta gradisí Papachi Martis inmensamente pa pone e lugá na disposishon di e organisashon. Hopi hende a yuda ku tur nan forsa pa finalisá e proyekto. Dios lo bendishoná boso. Raul Perez Gomez tambe a yama danki i gradisí señor. Uni nos por logra hopi i a logra, el a menshoná. Despues a papia Milda Rosario, kende a trese un historia tokante e edifisio. E karta ta skirbi pa Du Dortalina. Sigui pa dilanti Dios tei pa yuda, e keda menshoná na final di e karta.  

Diputado James Kroon a dirigí palabra i entre otro a menshoná, kaminda Dios ta presente, kos bon ta sosodé. “Tremendo proyekto i danki pa tur ku a hasi posibel pa esaki bira realidat. Matrial i man na obra a hasi esaki posibel. Nos den komunidat ku boluntat di kada persona nos ta logra. Awendia hopi kunuku ta deskuidá, hendenan no tin amor pa e kosnan. Esaki ta un ehèmpel si bo ta deseá, e kos ta sosodé. Na Boneiru no mester ta difísil. Dividí nos no ta logra. Solamente huntu,” diputado Kroon a menshoná na e okashon.

Share This
error: Content is protected !!