KRALENDIJK – Segun suidadano Arthur Sealy, e krísis di korona a pone un lus grandi i skèrpi riba Bonaire ku ta tapá bou di un klechi kolorido bòrdá di medidanan tumá pa gobièrnu. A isolá Bonaire ku konsekuensianan ekonómiko i finansiero ku a krea desempleo i un kantidat grandi di hende ku a bini na remarke pa ayudo di banko di kuminda. Hulanda a yuda pa aliviá e situashon. No a dura mashá ku na momentu ku a presentá kasonan di Covid-19, spesial unu dudoso, a start bou di e klechi un bringamentu formal pa mas transparensia, informashon i komunikashon. E bringamentu aki ta mustra nos na un manera kla, ku bou di e klechi ta reina: insiguridat, deskonfiansa, desunion, egoismo, miedu i iresponsabilidat. RIVM di Hulanda a intervení i e parti di informashon a bai serka RCN. Gezaghèber i eksperto hulandes a tuma rienda. Un grupo di tres a bringa ku un grupo di seis pa trese bonerianonan den eksterior Bonaire. A forma grupo ku a bisa, no abri porta pa esnan den eksterior. Otro tabata ke tene fiesta riba trinta di aprel, dia di Rincon. Gobièrnu a para e fiesta. Un grupo mas saksenu a para fiesta riba dia di Rei. Desòrdu bou di klechi pa motibu ku tòg a tene aktividat den un huki di e klechi. Ku man duru a isolá e huki ei pa laga nos kòrda riba apartheid na Sur Afrika. A bini ku un “blas di airu” i a kuminsá neglishá medidanan i aglomerashon di hende a tuma lugá. Mira futbòl i Sabor di Bonaire. Awor ku e “blas di airu” a spat for di otro ta reina miedu i pániko pa no bini hende for di Aruba i Hulanda ku malesa i drenta bou di e klechi. Kua lider por trankilisá e pueblo i mustra na un manera konvisente ku: mester mantené e medidanan ku tur hende ta na altura. Splika ku ta bini medida pa tapa boka na sierto sitio i establesimentu, ku no tin selebrashon di Dia di Bonaire, no tin Regata, no ta risibí San Nikolas, no tin festival di tumba ni karnaval. Mester ta posibel pa yama tur organisashon huntu, kòrda riba e lema HUNTU, i splika nan ku ta tuma medida. Tambe mester tin un aklarashon kon ta bai kuminsá e aña eskolar. Diputado Nina Den Heyer no lubidá ku bo ta un lider den e skuridat na Bonaire. Pa tur ku ta pidi pa resa pa Aruba ta bon pa uni den orashon na un lugá sagrado. Dios ta pidi sakrifisio. Mustra ku bo ke sakrifiká. Pidi solamente pa orashon no tin efekto. Mateo 18.20 ta bisa ”Pasobra kaminda dos òf tres reuní den mi nòmber, Ami lo ta huntu ku nan”.

Share This
error: Content is protected !!