KRALENDIJK – Diputado Nina den Heyer den entrevista ku Radio Live 99.9 FM a papia tokante e trayekto di ‘BES(t) 4 kids’. El a menshoná kon esaki ta hinka den otro i e plan pa den futuro. “E trayekto di ‘BES(t) 4 kids’ ta unu huntu ku Hulanda ku e meta pa hisa kalidat di akohidanan pa mucha. E parti mas importante ta pa pèrkurá pa e krèsh ta pagabel pa kada mayor, pa garantisá ku tur mucha por bai krèsh. Ta trata di un proyekto ku ta tuma su tempu i huntu ku Hulanda a bin ku e idea pa kuminsá dal algun paso i trata pa baha gastu òf e parti di kontribushon ku un mayor mester paga pa luna. Un krèsh no por kobra un mayor mas ku 200 dòler pa luna pa 1 yu. Esaki ta konta tambe pa akohida despues di skol ‘Naschoolse opvang’. No ta e idea tampoko aworaki pa motibu di e yudansa di Hulanda pa esnan ku ta kobra ménos ku 200 dòler, hisa e preis. Ta bai tin kòntròl pa esaki no sosodé. E yudansa ta bin spesial pa baha e parti di kontribushon di mayor i tambe pa e krèsh por hisa nan kalidat di e organisashon. E yudansa ta enserá ku e mayor ta paga un parti, i na banda di esei, e krèsh ta risibí un parti di sèn for di Hulanda. E sèn ku e krèsh ta risibí ta dependé di e edat di e mucha òf si ta beibi etcetera. Pues mayor ta sigui paga su kontribushon, i loke awor a stipulá ta ku esaki no por ta mas ku 200 dòler inkluyendo ABB. Si un krèsh tabata kobra un mayor mas ku 200 dòler pa yu, e tin un obligashon pa baha esaki na 200 dòler pa yu. Den kaso di e krèsh ku ta kobra ménos ku 200 dòler no por hisa e pago. Si esaki sosodé, òf si nota kualke iregularidat ta bon pa informá gobièrnu na 717-2211, puntra pa sra. Ruthmila Sint Jago i pa atendé ku e situashon. Lider di proyekto di BES(t) 4 kids Boneiru ta sra. Tamara Nicolaas. 

Krèshnan nobo tambe ta bai tin diferente rekesito ku mester tene kuenta kuné pa nan haña pèrmit pa por eksistí. Un akohida pa mucha ku lanta awor mester kumpli ku tur regla direktamente. Esnan ku ya ta eksistí tin un periodo di grasia. Pues si mester drecha algu ta dun’é un tempu pa e adaptá e situashon. Loke ta pone hopi atenshon n’e, ta e parti di seguridat pa e muchanan. Entre otro no por ta posibel ku un krèsh tin un kamber di beibi pegá ku kushina. Esakinan mester wòrdu adaptá inmediatamente. Pues e yudansa ta bin for di Hulanda ku e meta pa hisa e kalidat. Esaki ta konta pa esnan ku ta traha tambe na e krèsh, entre otro pa nan bai un kurso pa hisa nan konosementu. Ta notabel ku e krèshnan ta hasi uso di e oportunidat pa mehorá nan servisio den tur sentido loke ta hopi bon. E trayekto di ‘BES(t) 4 kids’ ta bai konhuntamente ku e akohidanan di mucha. Tin seshon di informashon i tin bon koperashon di krèshnan loke ta hopi bon. E ayudo ta unu temporal i den futuro e ta bai bira unu definitivo den lei. Meskos ku ‘kinderbijslag’ ta den lei, e parti di yudansa pa akohida pa mucha tambe ta bai bira di e forma ei. Huntu ku Hulanda a kuminsá den un forma di transishon di e forma aki pa awor,” diputado den Heyer a bisa.  

Pa mas informashon por bishitá www.best4kids.nu

Share This
error: Content is protected !!