KRALENDIJK – Diputado Nina den Heyer a papia tokante aktividatnan sosial ku ta pendiente pa e temporada binidero. Entre otro el a papia di Dia di Boneiru, Regata i yegada di Sanikolas na Boneiru. ”E situashon di korona a pone ku mester revisá aktividatnan kon ta bai organisá nan òf no kontinuá. E festival un kanto pa Boneiru a keda ta kanselá. A purba pa organisá algu, sinembargo debí na e kantidat mínimo di interes, a kanselá esaki. Debí na e problema di ‘corona vírùs’, mester adaptá na diferente aspekto pa por organisá un aktividat i no ta sigur kon ta bai ta e dia ku bo ta plania bo kos, i si abo komo organisadó ta bai saka sèn di e gastu ku a inbertí den e aktividat. Ta bai organisá dia di Boneiru dia 6 di sèptèmber di un forma simpel. No ta bai tin e parti festivo i kultural den bario. Ta bai tin solamente e parti ofisial i esaki lo ta solamente pa miembronan di kolegio ehekutivo, miembronan di konseho insular i suidadano nan di honor. E parti ofisial ta keda transmití bibu pa medio di televishon i ‘Facebook’. Tambe ta hasiendo grabashon di gruponan krioyo aktualmente i riba dia di Boneiru despues di e parti ofisial, ta pasa loke ya a graba pa tur hende por disfrutá di dje. Esaki kisas no ta dushi manera nos a kustumbrá, sinembargo mester tene kuenta ku situashon aktual i no tuma niun rísiko.

Pa loke ta trata Regata, ta un aktividat ku tin aglomerashon di hende, i pa sigurá debí ku nos no sa kon e situashon ta riba e dia ei na luna di òktober, nos a disidí ku e festival di anochi no ta tuma lugá. E parti di kompetensia riba laman si ta kontinuá na un manera mas seif posibel. Mester tuma medida pa e situashon tokante e problema di COVID-19. Pa loke ta trata Sanikolas, tur kos ta sigui normal, esta e parti di yegada. Nos ta den kombersashon ku e organisashon pa wak kon ta organisá e parti di yegada di Sanikolas na Boneiru pero tambe di forma adaptá. Na momentu ku tin mas informashon tokante yegada di Sanikolas, ta informá komunidat,” diputado den Heyer a bisa.

Share This
error: Content is protected !!