KRALENDIJK – Djaweps awó 13 di ougùstùs departamentu di Diálisis di Fundashon Mariadal ta organisá e di dos presentashon ku e tópiko ‘Biba salú ta prevení malesa’. E presentashon ta tuma lugá den Sentro di Bario Nort’i Saliña i ta kuminsá pa 7’or di anochi.

Bo tabata sa ku un gran parti di nos poblashon tin preshon muchu haltu? I mayoria hende no sa esaki di nan mes. Preshon haltu por okashoná daño na bo kurason, bo adernan òf bo órganonan.

Tambe bo por tin malesa di suku (diabétis), sin ku bo mes sa esei. Esaki tambe por ta dañino pa bo kurason i bo adernan. Pero pa un gran parti bo por prevení ámbos malesa pa medio di un estilo di bida salú. Si bo kome salú i move sufisiente, bo ta evitá hopi problema. Prevení ta mihó ku kura. Durante e presentashon na Sentro di Bario Nort’i Saliña, Fundashon Mariadal ta konta tur kos tokante esaki.

Esaki ta e di dos di un seri di presentashon den e lunanan binidero na enkargo di Fundashon Mariadal. Entrada ta grátis!

Share This
error: Content is protected !!