KRALENDIJK – Gezaghèber di Boneiru Edison Rijna a papia awe djaweps durante un enkuentro ku prensa, pa informá komunidat tokante e situashon aktual di COVID-19.  

“COVID-19 ta parse hopi leu pasobra aktualmente no tin niun infekshon na Boneiru. A tèst te ku e dia di awe 480, di kua 475 a tèst negativo. 5 a tèst positivo i ya nan a rekuperá. 16 hende ta aktualmente den karentena, kendenan a regresá for di eksterior. E bon ta ku no tin niun indikashon ku e vírùs ta na Boneiru. Na mes momentu hopi habitante di Boneiru ta sinti inkietut pa motibu di e kantidat di hende ku COVID-19 na Aruba, pasobra tin chèns ku biaheronan ta bini Boneiru ku e vírùs. Nos mes ta responsabel pa prevení ku e vírùs ta plama. Nos ta hasi esaki pa medio di tene distansia for di otro. Esaki ta nifiká tene distansia ora di saludá otro tambe, pues no duna man, no brasa, no duna ‘high five’ òf èlebog. Tambe ta importante pa evitá multitut di hende, pasobra e vírùs por plama fásilmente kaminda tin grupo di hende. Banda di esei ainda tin diferente tipo di medida di higiena, manera regularmente laba bo mannan ku awa i habon, no mishi ku bo wowonan, bo nanishi i bo boka i nister i tosa den bo èlebog òf lensu di papel. Finalmente, bo tin keho? E ora ei keda kas i tuma kontakto ku bo dòkter di kas òf yama e number grátis 0800-0800. Por yama for di 8’or di mainta te ku 10’or di anochi. Si tur hende tene nan mes na e medidanan aki, nos ta hasié hopi difísil pa e vírùs por plama i nos ta protehá nos mes i e hendenan rondó di nos.

Aktualmente no por biaha pa Aruba òf hende di Aruba i Sint Maarten no por yega Boneiru. Awor aki Aruba ku St Maarten ta un pais di riesgo haltu. Espasio aéreo ta keda habrí si, pero pasaheronan no ta liber mas pa biaha di Aruba i Sint Maarten pa Boneiru i vise versa. E kantidat di kaso di personanan kontagiá ku COVID-19 a subi drástikamente na Aruba. Ta konsehá biaheronan entre Aruba, Sint Maarten i Boneiru pa posponé nan biahe un ratu. Personanan ku pa un motibu spesial tòg mester bini for di Aruba o Sint Maarten pa Boneiru ta obligá pa yena e deklarashon di salú i bai den karentena durante 14 dia, manera ta menshoná den e ordenansa di emergensia. Si bo tabata den kontakto estrecho ku un persona ku a tèst positivamente, e ora ei mèldu bo mes na e departamentu di Salú Públiko via di e number gratis 0800 0800. Mésun kos ta e kaso si bo a bishitá e barnan i e ‘gym’ ku nan a klasifiká komo sitionan di riesgo. Muchanan ku tabata na Aruba i a regresá Boneiru, i no tin keho òf síntoma di e vírùs, por bai skol otro siman normal. Esnan ku ta den eksterior i ta biba na Boneiru, por hasi petishon pa atendé si ta posibel pa nan regresá Boneiru. Por manda email na: repat@bonairegov.com. Mester ta bon kla ku biahamentu ta tuma lugá riba propio responsabilidat. Gobièrnu no ta paga niun gastu.  

Hospital na Boneiru ta kla pa por atendé ku un kantidat di 7 pashènt, pa e parti di kuido intensivo. Momentu esei no ta posibel, ta manda nan pa un hospital na un otro isla den bisindario. Ta bai laga tur hende ku ke tèst, hasi esei pa medio di e ‘COVID Drive true’. Por yama 0800-0800 pa hasi esaki. Por hasi e tèst na kas tambe pa esnan ku no por bai hospital. No ta tèst hende ku no tin síntoma.   

Skol ta bai kuminsá i ta normal ku muchanan ta hunga huntu. Ta papiá i konosí ku e vírùs no ta transmití di mucha di un pa otro. Si tin mucha ku ferkout, ta bon pa e keda kas i momentu ku e ta bon, regresá skol.  

No duna pèrmit fásilmente pa organisá aktividat. Ta tuma bon nota kon e organisadó ta bai organisá algu. Tin empresa a tuma riba nan mes ta stòp algun aktividat. loke nos ta hopi kontentu i spera otronan tuma esaki komo ehèmpel. Ta bai revisá tur pèrmit ku a entrega pa organisá aktividat sosial, i evaluá si esei ta posibel pa kontinuashon.  Ta hopi importante pa mantené distansia sosial. Esaki ta bon pa kada un di nos, pa no kontribuí na plamamentu di e vírùs, si e yega Boneiru. Boneiru ta liber di ‘COVID-19’, esaki debí ku e komunidat ta mantené nan mes bon na e reglanan pa evitá pasamentu di e vírùs di un pa otro. No mester drenta pániko. Simplemente nos tin ku keda alerta pa kos no bai for di man, manera ta e kaso na Aruba ku ta di lamentá. 11 persona a bini for di Aruba pa Boneiru i ta den karentena. Dividivi ta bula for di Aruba i wikènt binidero ta stòp di bula e destinashon. For di Sint Maarten tin mes kondishon ku tin pa Aruba. Tin kontakto ku tur hende i e situashon ta bou di kontròl,”gezaghèber Rijna a bisa.  

Share This
error: Content is protected !!