Kralendijk – Djasabra 1 di ougùstùs último, Sekshon di Kultura, Arte i Literatura(SKAL), e aña aki den koperashon ku komishon Arte di Palabra a selebrá 15 aña di Arte di Palabra Boneiru. Arte di Palabra ta un kompetensia Literario, Poesia i kuenta kòrtiku. Un total di 12 hóben a kompetí den 4 kategoria: kategoria kuenta eksistente, kategoria kuenta original, kategoria poesia eksistente i kategoria poesia original. E aña aki e tema tabata “Fiesta di palabra”. Diputado James Kroon kende a remplasá diputado Nina den Heyer a kuminsá na felisitá e organisadónan ku ya pa diessinku aña ta organisá e kompetensia aki. Skal den koperashon ku komishon Arte di Palabra e aña aki a dediká e premio “Pipita di Kònkòmber “ na sra. Denise de Jongh Rekwest. Esaki pa su aporte i estímulo duná na uso di idioma papiamentu, i ku e ta promové ortografia di papiamentu.

E resultado di premiashon djasabra promé di ougùstùs último ta lo siguiente:

· Ganadó absoluto Kompetensia Arte di Palabra Boneiru 2020:
Juriella Josephia – Titulo di obra: Don Pepe – Outor: Juriella Josephia

· Di dos Finalista Kategoria Poesia Original:
Shellany Sebelon – Titulo di Teksto: Un granito na bo honor – Outor: Shellany Sebelon

· Promé Finalista Kategoria Poesia Original:
Jeaniro Dorothea – Titulo di teksto: E ruta – Outor: Jeaniro Dorothea

· Ganadó Kategoria Poesia Original:
Irlenska Martines – titulo di teksto: Fin di Mundu – Outor: Juriella Josephia

· Ganadó Poesia Eksistente:
Ramso Coffie – titulo di teksto: Mi por – Outor: Lyndon Leito

·  Ganadó Kategoria Kuenta Original:
Juriella Josephia – Titulo di obra: Don Pepe – Outor: Juriella Josephia

· Ganadó Mihó Outor Kategoria Kuenta Original Arte di Palabra Boneiru 2020: Titulo di teksto: Don Pepe – Outor: Juriella Josephia

· Ganadó Mihó Outor Kategoria Poesia Original Arte Palabra Boneiru 2020:
Titulo di teksto: Tin un Lus – Outor: Juriela Josephia

· Ganadó Premio Mayornan Mas Motivá: Mama Irlaika i tata Andy Martines, mayornan di Irlenska Martines

E hóbennan aki lo bai kompetí i representá Boneiru den e kompetensia di Arte di palabra entre islanan ABC, ku lo tuma lugá djasabra awó 15 di ougùstùs 2020 aki na Boneiru.

Share This
error: Content is protected !!