KRALENDIJK – Drs. Esther Bernabela, den su kalidat komo lider di frakshon di partido UPB den Konseho Insular i alabes Vise-Presidente di e partido, kier yega na un diálogo ku lider di frakshon di Demokrat, Clark Abraham. Pa e motibu aki Bernabela a manda un karta pa e lider di frakshon di partido Demokrat ku un invitashon pa tene un reunion kaminda konhuntamente, komo lidernan di frakshon den Konseho Insular, por yega na un entendimentu di e problemanan ku segun Abraham ta strob’e i su frakshon pa asistí na reunionnan di Konseho Insular.

Bernabela ta bisa: Rekonosiendo ku tin fayonan a ser kometé di ámbos banda, ta di sumo importansia pa mantené e sistema demokrátiko, ku tin bes ta parse di no ta funshoná. Esaki ta keda garantisá mediante e sistema di koalishon i oposishon.

Personalmente i komo e miembro senior den Konseho Insular, mi ta di opinion ku diferensia di opinion no mester ta motibu pa un kiebro den konseho insular unda no tin presensia di oposishon. Permitimi i mi ta suprayá ku ta toka nos kada un e obligashon ku nos mester sinti i karga nos responsabilidat no solamente ku nos mes pero mas aun ku e pueblo ku nos ta representá.

Pa e motibu aki mi ta ekstendé un man di invitashon den un intento pa yega na un diálogo pa mira kon pa sigui dilanti komo un Konseho Insular funshonal ku pueblo di Boneiru por ta orguyoso di dje. Un Konseho ku su diferensianan di opinion pero no kibrá i dividí. Dia di Boneiru, 6 di sèptèmber ta serka, Boneiru nos mester ta uní i no dividí. Mi invitashon no ta mara na ningun kondishon.

Sperando di risibí un kontedta afirmativo pa por enkontrá ku otro mi ta terminá ku saludos i apresio,

Drs. Esther Bernabela , konsehal Lider di Frakshon UPB

Share This
error: Content is protected !!