KRALENDIJK/THE BOTTOM – Biaheronan for di Boneiru i Kòrsou di awor pa dilanti ku kier biaha pa Saba, mester keda dos siman den karentena obligatorio. Siman pasá a detektá dos kaso mas di infekshon na Saba i tin 19 persona den karentena. Gezaghèber di Saba Jonathan Johnson durante un “update” djamars último di kasonan di corona vírùs a bisa ku e motibu prinsipal di e desishon aki ta ku Boneiru i Kòrsou tabata tin frontera habri te ku siman pasá ku Aruba. Esaki a pone ku e profil di risiko pa Kòrsou i Boneiru a kambia di “low” pa “medium”. E último dianan kasonan di infekshon di corona vírùs a subi drastikamente na Aruba. E karentena obligatorio pa biaheronan for di Kòrsou i Boneiru no ta konta pa personanan ku ta regresá nan isla despues di a risibí kuido médiko riba e islanan menshoná. Tambe ta keda atmití studiante-habitante- ku ta regresá i biahenan esensial. P’esei mester pidi pèrmit promé serka outoridatnan. Pa bishitantenan for di Sint Eustatius no tin restrikshon.

Share This
error: Content is protected !!