ORANJESTAD – Kontando for di 13 di mart 2020 ku Aruba a konosé e promé dos kasonan positivo di Covid-19, ayera djasabra e Departamentu di Salú Públiko (DVG) i gobièrnu di Aruba a informá ku ofisialmente Aruba a surpasá mil kaso di hende kontagiá ku Coronavírùs.

Den un último informashon, ta informá ku a tèst total 15772 persona na Aruba, di kual 14724 a tèst negativo i 1048 positivo. Di tur esunnan positivo, 193 a rekuperá, 4 a fayesé i 851 ta aktivo ainda.

MAS PERSONA TA SIGUI REKUPERÁ

Despues di 11 dia ku e di dos ola di Covid-19 a kuminsa na Aruba, a kuminsa duna outorisashon na algun persona pa sali di isolashon i registránan riba lista di esnan rekuperá. Un update di djasabra ta ilustrá ku 30 persona mas a wòrdu saká for di isolashon i ta bin riba lista di esnan rekuperá. Djabièrnè 49 persona a wòrdu saká for di isolashon. Pues un total di 79 persona ya a rekuperá den e dos ola di corona vírùs. Di e forma aki Aruba a kuminsá riba e kaminda di rekuperashon atrobe. Pa loke ta kasonan nobo djasabra un total di 75 a keda registrá.

YUDANSA DI HULANDA.

Ku mas di 800 kaso aktivo, estadistiká ta mustra ku awó e pashèntnan ta kuminsa bira malu i yega hòspital pa tratamentu médiko mas avansa. Mirando e kantidat di kasonan aktivo aki, djasabra anochi un avion di EZ-Air ku 10 enfermera i 1 dòkter a yega Aruba pa yuda den e unidat di kuido intensivo na Dr. Horacio E. Oduber Hòspital. Nan ta Merikanonan ku tabata na Kòrsou, wardando un yamada pa bai yuda sea na Sint Maarten òf Aruba. Gobièrnu di Hulanda ta paga tur e gastunan, meskos ku a kumpra ekiponan médiko pa e unidatnan di ICU na e islanan. Na e momentunan aki tin 11 pashènt interná den hòspital di kual dos ta den e unidat di kuido intensivo(ICU). 

Share This
error: Content is protected !!