KRALENDIJK – E kampionnan di e torneo di futbòl veterano di s.v. Deportivo ku a finalisá djasabra último den Stadion Kralendijk na Playa, e ekipo di Nort Saliña Vets, djadumingu último a hasi entrega di e trofeo kampion na Famia di Enoc “Nòki” Melaan (e.p.d.) ku na bida tabata hungadó klave di e ekipo di Nort Saliña Vets.
Despues di a titulá kampion di e torneo djasabra nochi, djadumingu den oranan di atardi e tim i su fanatikonan a bini huntu Bou di Palu na Mentor.
Aki nan a selebrá un ratu ku músika i algu di bebe, pa despus drenta e bario di Nort Saliña Kunuku Bieu ku òptògt, unda ku despues di a pasa den e kayanan di e bario, a finalisá na kas di Mama i Tata di Nòki ku ta Lucio i Ada.
Akinan primeramente e hiba palabra sr. Obi Winklaar ku a splika e motibu di ta serka e famia di Nòki.
Promé ku e la pasa palabra pa e presidente di Nort Saliña Vets ku ta sr. Gino Lepelaars, a tene 1 minüt di silensio pa Enoc “Nòki” Melaan.
Na e momentunan ei a hasi entrega tambe di e trofeo kampion na e mama i tata di Nòki.
Despues a sigui selebrá ku músika i algu di bebe.
Riba potrètnan por mira momentu ku e òptògt a sali na Mentor drenta Nort Saliña i yega na kas di e mama i tata di Nòki, tambe momentu ku a entregá e trofeo na nan, tambe un shirt na e tata di Nòki ku su number ariba.

Share This
error: Content is protected !!