KRALENDIJK – Cherel Kwidama presidente di sindikato A.F.B.W. for di 2004 ta na Boneiru i ta sigui hopi di aserka e parti di sindikalismo. “For di edat hóben mi tabata biba ku asuntunan di sindikalista. Mi tabata skucha hopi di esnan ku tabata aktivo na Kòrsou, i tempu ku mi a biba na Hulanda. 2005 pa 2006 mi tabata ya den A.F.B.W.. Despues di un aña mi a stòp di forma parti di e organisashon. Kasi 13 aña a pasa, i mi a bolbe drenta e mundu di sindikalista. E proseso a kana i awe mi ta presidente di AFBW. Diferente kos a sosodé durante e temporada ku ami ta forma parti di A.F.B.W.. Pa mas o ménos 54 aña A.F.B.W. a mantené e mes un statuto. Sigur a yega tempu pa hasi kambio. 28 di yüli 2020 a hasi e kambio. Hopi kambio importante a bini aserka. Awor tin miembro di direktiva nobo. E statuto nobo ta pone ku e direktiva ta keda 3 aña. Despues tin ku pone pa medio di elekshon un direktiva i presidente nobo. Ta posibel pa kontinuashon di un presidente pa 6 aña, i no pa mas tempu. Tabatin 50 miembro i awor e ta 450. Fundashon Mariadal ta esun ku tin mas miembro ku ta 400. Tur hende ku ta traha por paga i bira miembro di A.F.B.W.. $17.50 ta kosta pa inskripshon i e kontribushon ta e mes un montante na dòler, esaki pa luna. Nos meta ta pa e trahadó i e doño di trabou ta kontentu.         

Un bon doño di trabou tin ku paga na tempu fin di luna. 25 di luna ta bon fecha, i si a palabr’é, kumpli kuné. Duna rèspèt pa na e trahadó, meskos e trahadó pa e doño. Área di trabou mester ta limpi i konfortabel. Trata trahadó igual no un mas ku otro. Esaki por ta krea diferente grupo den un kompania. Dianan di fakansi ta hopi importante pa trahadó tin dia liber, pa e bai afó algun dia i regresá pa kontinuá den bon harmonia. Un hende kansa no ta funshoná bon. Tambe tin derechi di trahadó. E trahadó mester kumpli ku palabrashon. Sigui palabrashon di loke e doño di trabou a pone. Bo mester ta bon trahadó, un persona trankilo i no bira agresivo ku doño di trabou. Ámbos tin regla ku mester sigui. Esaki ta algun i tin hopi kos mas.   

A.F.B.W. ta funshoná kaminda ku e direktiva ta reuní strukturamentu un bia pa luna. Ta atendé tambe ku shopsteward, kendenan ku tambe ta topa ku A.F.B.W.. A eduká miembronan di A.F.B.W. kaminda nan a sigui un kurso. Nos a reuní tambe ku USIBO un bia pa luna. Mester reorganisá sindikatonan i ‘one man show’ no por sigui mas. A.F.B.W. ta porta habri pa mas miembro,”Cherel Kwidama a bisa.  

Share This
error: Content is protected !!