KRALENDIJK – Aktualmente tin hopi reklamo di habitantenan di E.E.G Boulevard tokante e kanalnan ku WEB N.V. a koba i ketu bai ta habri sin ku a sera nan. Esaki ta trabounan di renobashon di e liñanan di awa di irigashon ku mester transportá awa di irigashon bèk pa hotelnan (9e EDF). E proyekto ta kuminsá na Belnem i ta kaba na altura di planta di awa na Hato. Por komprondé ku diferente habitante di e área di Belnem a tuma kontakto ku WEB, i nan a menshoná ku ta bai publiká un komunikado pronto tokante e trabounan. Segun e habitantenan e situashon ta asina ya pa 1 luna i 10 dia kaba. Nan no por risibi bishita na kas, tin hopi bochincha i stòf. Ademas esaki ta forma un situashon peligroso ku dos outo no por pasa banda di otro. E komunikado sigur lo no sera e buraku òf kanalnan habri, tabata loke e hendenan a menshoná. Pa e motibu aki nan a tuma kontakto ku Radio Live 99.9 FM, i a papia di e situashon. Radio Live 99.9 FM a tuma kontakto ku departamentu di informashon di WEB, i nan a splika ku nan tin atenshon pa e situashon. Nan a menshoná ku ta bai sali un komunikado, kaminda ta duna mas informashon kon leu e trabou nan ta, i kiko ta bai sosodé tokante e kanalnan habri. E trabou nan ta den e promé fase, i ta bai den bon direkshon pa kontinuashon. A menshoná tambe di parti WEB, ku outonan ta kore ku velosidat haltu den e área, i ta bon pa outomobilistanan tene kuenta ku e área, kaminda tin trabou ta tumando lugá kantu di kaminda. Pues WEB ta bai publiká un komunikado ku ta informá tokante e trabounan den e área di Belnem, i ta kontinuá informando e pueblo ku regularidat. 

Share This
error: Content is protected !!