KRALENDIJK – Gobièrnu di Boneiru tin plan pa bai drecha kamindanan di kunuku. Den e presupuesto anual, a presupuestá 1,000,000,- dòler, esaki pa mantenshon general, loke tur aña no ta sufisiente. Pa medio di kambionan i repartishon di surplus ta bai subi e montante aktual. E montante disponibel pa mantenshon di infrastruktura, ta uz’é entre otro pa yena buraku i drecha kaminda di tera, limpia labadó, dam i limpia i kap mata kantu di kaminda. Ta atendé tambe ku limpiesa di e yerba sargasum for di e montante menshoná. Loke a keda tras ta e parti struktural pa mantenshon di e kamindanan di kunuku. E plan ta pa drecha tur kaminda di kunuku den 2020 ku ta rekerí atenshon, ku algun aña no a hasi nada na nan. Meskos ta e kaso ku damnan, gobièrnu ta deseá pa drecha nan, i pone un plan di mantenshon pa futuro. Tin deseo pa un plan stratégiko di mantenshon di pa loke ta trata infrastruktura, sinembargo esaki ta rekerí sèn. E suma ku tabatin disponibel pa infrastruktura, un parti di dje ta pone un banda pa hasi otro kos. Entre otro a usa un montante pa gastunan di infrastruktura pa e proyekto di 500 kas sosial di FCB. A uza sèn tambe pa lanta e komishon di hürdó. Pues e montante ku tin disponibel no ta sufisiente pa hasi loke mester hasi i pa e motibu aki gobièrnu ta deseá pa eliminá retraso ku tin den e parti di mantenshon. Pa esaki mester di 4000,000,-, pa gobièrnu logra e meta pa drecha tur kaminda di kunuku, i kontinuá ku e parti mantenshon di infrastruktura. 

Share This
error: Content is protected !!