KRALENDIJK – Resultado di elekshon di 2019 ta e siguiente; MPB kuater asiento, DP tres asiento i UPB dos asiento. MPB i UPB a forma gobièrnu ku diputadonan Elvis Tjin Asjoe i Nina Den Heyer di MPB i James Kroon di UPB. Di e nuebe miembronan den Konseho Insular ta solamente sinku ta bai reunion. DP ta rabiá i ta akusá Gezaghèber Edison Rijna, presidente di Konseho Insular, di ta trek partij. Un miembro di MPB tin problema ku salú i no por ta presente na reunion. Lei ta bisa ku Konseho Insular ta konsistí di nuebe miembro. Pues DP tin ku kumpli ku su votadónan i MPB mester hasi máksimo esfuerso pa su frakshon ta kompletu. Tin mas asuntu ku ta toka pueblo ku meresé aklarashon di parti di Gobièrnu. Kon ta pará ku e relato di e eks direktor di R&O Ta kosnan ku e mes a laga hasi òf ku tabata den ehekushon kaba. Kon a yena e vakaturanan na R&O. Ta pa un kompania so a skohe pa tur trabou di konstrukshon di karetera, kua kompania ta kontrolá ehekushon di e trabounan. A skohe pa yu di tera bira hefe. Otro problema ta e awa ku ta keda para despues di yobida na Tanki Matrimonio. Ken mester remediá e kaya. Ki palabrashon tin? Kon ta ku e desaster den Saliña di Vlijt. Kuantu sèn e kos aki a kosta i ken a haña e botin mas grandi. Un yu di tera a entregá su retiru na TCB, un otro yu di tera no ta hefe di finansa mas, un yu di tera no por haña trabou na R&O pasobra e no tin eksperensia. Tokante Programa mènedjer Danny Royer ki dia ta sali mustra kiko a logra òf niun hende no mag sa. Ta bai privatisá V&P i Indebon?. Asuntu di Masterplan. Ken ta kere ku por skirbi un masterplan den seis siman. Si por, ya e eskoho ta hasí dia bieu i e rapòrt final ta kasi kla i a nombra un miembro di partido pa bira mènedjer di programa. Ta un shou di gaña gaña pa gana sèn tin riba lomba di pueblo i organisashonnan sosial ku ta kontribuí pa “Spek en bonen”. Masterplan 20-30 ta un frakaso pa motibu ku bo no sa kiko tin otro siman te pa bo sa kiko tin aki 30 aña na desaroyo. Ningun hende, a ni Nostradamus, no por mira den futuro. Na Bonaire ta dos persona so tin ku por pronostiká kiko por tuma lugá aki tres òf kuater dia. Nan ta Dòlfi Wout i Bano Pourier ku ta duna informashon tokante wer. Ta nan ta hasi trabou, di e kolorido EBT, den temporada di orkan, anto grátis. Un pregunta serio na Elvis: bo ta keda lider di MPB òf bo ta pasa e batuta pa Nina. E koló blou a kuminsá blikia i e koló bèrdè a kuminsá bria.

Share This
error: Content is protected !!