KRALENDIJK – Dia 23 di ougustus Parokia San Bernardo ta bai selebrá su fiesta patronal San Bernardo, i ta invitá tur parokiano i henter pueblo di Bonaire na promé lugar pa Triduo riba dianan 20 ougustus – mitar di 7 mainta, sigui pa adorashon henter dia, djabièrne 21 pa 7or i djasabra 22 di ougustus pa 7’or anochi; Dia di Fiesta djadumingu dia 23 di ougustus misa di selebrashon lo ta pa 9’or di mainta.

Santu Sakrifisio di Misa lo ta presidí pa pastor Santiago Malagon Pedraza.

Alabes lo pidi Señor pa drama su bendishon I protekshon riba nos hubentut, riba nos muchanan, maestronan I mayornan den e aña eskolar nobo.

Pues nos ta warda henter famia djadumingu mainta 9’or na misa San Bernardo na Playa.

Historia di San Bernardo:

San Bernardo a nase na aña 1090 na un lugá serka di Dijon, Fransia. Despues di un edukashon religioso, el a djòin e Sistersiensenan na aña 1111, huntu ku henter su famia.

Sistersiense ta un Ordu religioso di hende hòmber òf muhé, ku ta praktiká regla di San Benito na un manera estrikto. Mas despues nan a eligié “ Abat”, kabesante di kloster di Monasterio di Clairvaux. Aya El a instruí su kompañeronan den práktika di birtut kristian pa medio di su ehèmpel. Pa motibu di un kiebro ku a surgi den Iglesia Katóliko, el a biaha bai hopi lugá na Oropa pa restablesé pas I union entre e fielnan. Su amor I deboshon pa Dios, pa Mama Maria I pa su próhimo ta reflehá den su obranan teológiko I spiritual. El a muri na aña 1153 riba dia 20 di ougustus.

Mara nos, ku ta selebrá memoria di San Bernardo, por siña kon hiba un bida kristian den nos ambiente na un manera agradabel den bista di Dios.

Share This
error: Content is protected !!