KRALENDIJK – Dos fèlt di futbòl mas lo haña yerba artifisial i tambe lo kambia e yerba na Stadion Kralendijk.
Ta trata di Fèlt Rudy Boezem na Nort Saliña Pabou i Fèlt di ATC na Tera Kòrá.
Na tur tres fèlt pues lo haña yerba artifisial nobo, ya ku lo kambia tambe di Stadion di Playa pa nobo.
E bia aki lo no buska yerba anto laga esei te einan.
Kos a kambia, e bia aki esaki ta inkluí tambe mantenshon di e yerba na e fèltnan, loke ta hopi importante.
Nos tur sa ku tur e fèltnan ku a haña yerba a keda te einan tambe sin mantenshon pa kua e durashon di e yerba artifisial ta muchu mas kòrtiku ku si a kuida esaki.
Nos ta den un klima kayente, pa kua mester muha e yerba konstantemente i tambe peña esaki, loke no a sosodé ku regularidat.
Na paisnan ku klima fresku mes ta muha, kuida i mantené e yerbanan na e fèltnan.
Nos akinan mester hasi esaki ku mas regularidat pa e yerba su durashon pa muchu mas largu..

Momentu ku kambia e yerba na Stadion di Playa, e fèltnan di ATC i di Rudy Boezem haña yerba, lo krea sigur mas espasio pa tur ekiponan di FFB i otronan tin lugá pa trein i hunga weganan di fogeo, loke aktualmente no ta e kaso ya ku fèltnan ta hopi skars.
Ku fèlt ku yerba esaki ta kita e peso solamente riba e fèltnan ku yerba aktualmente.
Si pone yerba na e fèltnan ku nos a menshoná ku ta Rudy Boezem i Fèlt ATC, nos tin 5 fèlt ku yerba, di kua si parti esakinan entre e 10 timnan di FFB, esaki ta nifiká 1 fèlt pa kada 2 tim.
Dos timnan pues di Rincon por hasi uso di Stadion Antonio Trenidad, dos timnan di Nort Saliña lo hasi uso di Fèlt Rudy Boezem, dos tim por hasi uso di Fèlt Elio Flores, dos tim por trein na Stadion di Playa i dos tim lo por hasi uso di Fèlt ATC pa treinen.

Share This
error: Content is protected !!