KRALENDIJK – Suidadano Eugene Rosauro Marinus a presentá na Radio Live 99.9 FM, pa ekspresá un situashon desagradabel tokante un toro di 4 aña bieu. A bai polis di bario, gezaghèber Edison Rijna i e departamentu di Toezicht en Handhaving, sinembargo nada a sosodé. El a konta ku e huntu ku otro habitantenan di Bario di Tera Kòrá, a skirbi i firma un karta i a entregá esaki na esnan ariba menshoná. Ta trata di un karta ku a bai for di 5 luna pasa fechá 3 mart 2020.   

“Bisiñanan a firma e karta i a pidi pa yudansa pa e problema. Ta trata di un toro i e situashon ta fastioso. E animal ta grandi i ta kousa hopi molèster di holó stinki i muska den e área. E famia doño di e toro ta bisa ta nan bestia di kas, sinembargo esei no por. E toro no tin falta, sinembargo e doño tin ku buska un solushon, esta hiba e toro otro sitio. E situashon ta na Kaya Theresa F. Ilario, den Tera Kòrá. Polis di bario a bisa e hendenan ku e toro no por keda na e sitio, sinembargo e animal no a disparsé. Ta notabel ku e bestia ta yená ku muska rònt di dje. Ya 5 luna a pasa i nada no a sosodé. E parti di higiena ta laga hopi di deseá den e área kaminda e toro ta. Nos a komprondé ku e doño di e toro tin pèrmit pa kria e bestia na e kas, loke ta imposibel kon nan a yega na e pèrmit,” Marinus a bisa.

Riba potrèt e toro den kura di kas den bario Tera Kòrá. 

Share This
error: Content is protected !!