KRALENDIJK – Diputado Nina den Heyer djaluna 17 di ougùstùs último a bishitá skolnan básiko riba e promé dia di skol. ”E promé skol ku mi a bishitá tabata Kolegio Kristu Bon Wardador na Nikiboko, despues Kolegio San Bernardo, Kolegio Rayo di Solo, Kolegio Strea Briante. Na skol Strea Briante, mi a risibí kalènder anual, i un karchi ku ta indiká tur fecha di dianan di fakansi. Esaki mi a apresiá imensamente. Tambe mi a bishitá e klasnan di Kolegio Kristu Bon Wardador, kaminda ántes tabata Papa Cornes School. Despues mi a bishitá Skol Amplio Papa Cornes, De Pelikaan i terminá na Kolegio San Luis Beltran na Rinkon. Tur skol ku diputado den Heyer a bishitá riba e dia, a risibí un baki ku bolo. Skolnan tabata bunita dòrná i dosentenan ku hopi ánimo pa risibí e muchanan. Mayornan tabata na altura tokante e situashon relashoná ku COVID-19 i ku no ta tur por a subi tereno di skol. E yùfrounan mes a risibí e muchanan i atendé ku nan riba tereno di skol. Solamente muchanan mas chikitu ku ta promé aña ta bai e skol, a hasi posibel pa mayornan por a bai te na e klas pa hiba nan yu i saka potrèt. Tabatin skolnan ku karikaturanan ku tabata risibí e muchanan. Hopi mayor a komentá ku porfin skol a kuminsá pa e yu regresá skol.

Dosentenan e aña eskolar nobo aki tin e tarea pa splika e muchanan tur loke mester kumpli kuné, relashoná ku e parti di higiena entre otro pa laba man i tosa den kokoti. Ta bon pa duna e dosentenan un estimulo pa nan balor inmenso. Nan tin un ròl i impakto importante den bida di e mucha.” diputado den Heyer a menshoná.

Nos ta deseá tur dosente i muchanan un felis aña eskolar 2020/2021 i ta sigui konta ku koperashon di mayornan pa e yu su propio desaroyo i seguridat.

Share This
error: Content is protected !!