KRALENDIJK – Gobièrnu di Boneiru ta bai sinta ku gruponan di karnaval, kaminda nan lo deliberá riba diferente punto. Kabesantenan di grupo a risibí invitashon pa asistí na e reunion ku ta bai tin. Ku tur probabilidat ta bai kanselá fiesta di karnaval na luna di febrüari 2021 aki na Boneiru tambe. Esaki ta un desishon igual ku Aruba i Kòrsou a pone komo aktividatnan grandi i di aglomerashon, ku no ta tuma lugá otro aña. Tur esaki tin di aber ku e problema konosí di último lunanan, esta ‘corona vírùs’. E situashon aki ta pone ku hopi hende a pèrdè trabou i no ta finansieramente stabil pa kubri gastunan pa ta den un grupo di karnaval. Kompania nan tambe ta pasando den momentunan difísil i lo ta aun mas difisil pa koperá ku gruponan komo spònser. Gruponan lo tin ku bai disidí i deliberá pa organisá e fiesta di karnaval riba un otro fecha durante 2021 òf si ta laga 2021 pasa, i organisá karnaval na 2022. E siman ku ta bini, gobièrnu i e gruponan ariba menshoná ta bai sinta pa deliberá kiko ta e idea pa tuma un desishon.     

Share This
error: Content is protected !!