KRALENDIJK – Djaweps último agrupashon musikal ‘Fenty Music’ a organisá un aktividat sosial, esaki relashoná ku e aña ku a terminá pa e grupo. Radio Live 99.9 FM a papia ku Janou Troeman kende ta forma parti di maneho di Fenty Music. El a konta tokante último desaroyo di e agrupashon musikal i plannan ku tin pa kontinuashon.

Di e forma aki Fenty a sera un kapítulo kaminda sigur mirando metanan stipulá na 2019 i evaluando basá riba resultadonan, sifras i kalidat di músika unu super éksitoso.

“Normalmente e grupo lo a reuní despues di temporada di karnaval 2020. Esaki no a sosodé debí na e problema di Covid-19. Djaweps último den oranan di anochi, a informá tur integrante di e grupo, kon e situashon ta, despues ku tabatin diferente moveshon, entre otro esnan ku no ta forma parti mas di e grupo. Fenty Music a pèrde masomenos 6 músiko den un tempu kòrtiku. Jurnick Clarenda, Philip Bernabela, Gerald Alberto, Luis Moka, Robert Felida i Zahid Frans. E último nòmber a informá maneho di lo bai dediká tempu na su propio kompania.

Mesora nos a papia tokante kontinuashon di e grupo, di awor pa dilanti i ku tin porloménos 7 músiko nobo ku ta bai forma parti di e konsepto nobo di Fenty Music. Pues por papia di un fin na e Fenty Music ku tabata eksistí ku tur hende konosé, awor un komienso nobo. Denter di mas o ménos 1 luna tur kos lo ta kla, i lo informá komunidat di e konsepto nobo di e grupo. Esaki no ta kita si ku kualke toká ku presentá kualke momentu for di awe pa dilanti, e grupo ta kla pa presentá,” Troeman a bisa. El a finalisá bisando: ”Fenty Music ta yama danki na pueblo di Boneiru pa a biba i sostené e banda durante e kasi 5 aña di eksistensia.” 

Durante e aktividat sosial di e grupo, a duna algun premio di estímulo na algun músiko, kendenan a destaká durante e aña tras di lomba. Esaki ta pa motivá kada músiko di e grupo pa sigui duna esfuerso pa perfekshoná. Músiko mas disipliná a resultá Farley Silvano, músiko mas motivá Alvaro Martines. Músiko ku mas a desaroyá Zahid Frans, músiko mas kreativo Gino John Offerman. Talento di aña a resultá Almahir Nicolaas.

Maneho di Fenty Music ta apresiá e input di kada un músiko durante e kasi 5 aña ku e banda a bin ta deleitá Boneiru ku bon músika.

Share This
error: Content is protected !!