KRALENDIJK – Awe djaluna 24 di ougùstùs, Warehouse Supermarket a habri ofisialmente nan sekshon nobo, awor mas amplio surtí. Ta trata di un área nobo ku tin den e edifisio. Radio Live 99.9 FM tabata presente mainta trempan pa asina tuma nota di apertura di e área nobo. Poko promé ku 8’or di mainta tur empleado di e supermerkado a reuní na e sitio nobo i a tuma bendishon. Pader Ivan Dario Perez Gomez a hasi orashon ku empleadonan di Warehouse, pa despues bendishoná e área nobo ku awa bendita.

Sander van Amstel, kende ta mènedjer di e supermerkado a menshoná ku e área nobo ta e promé parti di e desaroyonan ku tin pa loke ta trata ampliamentu di espasio di Warehouse Supermarket. “Esaki ta apertura di e promé parti i aki 2 siman ta bai kuminsá ku trabounan di konstrukshon na e otro área den e edifisio. E trabounan ta kanando bon i segun plan. Momentu ku e proyekto ta kla, e edifisio lo ta dòbel mas grandi di loke nos konosé awor.  

E sekshon nobo aktualmente tin diferente produkto di bon marka, bon kalidat i tòg nos ta purba mantené e preis abou. Warehouse ta un lugá di tur hende i nos ta deseá pa e hende lokal i e turista por kumpra tur loke e mester i paga tiki sèn. Nos tin entre otro diferente sorto di keshi, yogùrt tambe produkto di e marka ‘El latino’. Karni, fruta i bèrdura fresku no ta di papia mes. Mi ta invitá pueblo di Boneiru pa pasa tuma nota di tur loke a bini aserka den e supermerkado,”Sander a bisa. El a menshoná ku na komienso di 2021 si tur kos kana segun plan e supermerkado ta kla den su totalidat ku un espasio dòbel mas grandi ku awor. Sander:” Mi ta gradisí spesialmente mi empleadonan pa nan esfuerso pa nos a logra loke tin awor, un espasio mas amplio i bunita.” 

Kombinashon di potrèt ta ilustrá mainta momentu ku a habri e supermerkado i presentá e espasio nobo. 

Share This
error: Content is protected !!