KRALENDIJK – E ekipo di futbòl di e hóbennan di Young Boys di Nort Saliña, djadumingu último den partido pa tres i kuater lugá di e torneo Titans Cup 2020 di s.v. Uruguay den Stadion Kralendijk na Playa, den presensia di un bon públiko, a gana di s.v. Atl. Flamingo di Nikiboko i keda di tres lugá lagando s.v. Atl. Flamingo di kuater lugá pues di e torneo.
Young Boys a gana e partido 3-2 i keda di tres lugá.
Pa loke ta e partido riba su mes, na di 8 minüt s.v. Atl. Flamingo ta bai dilanti 1-0 ku gol di Yurick Seinpaal pa medio di pinalti.
Na di 34 minüt di e partido Atl. Flamingo ta bai dilanti 2-0 pa medio di outogol.
Na di 45 minüt di e partido, Xemion Celestijn ku un tremendo tiru ta kòrta bentaha pa s.v. Young Boys na 1-2.
Ku e skor 2-1 e partido ta parti na dos pa sosiegu.
Di dos mitar na di 80 minüt, Derreck Lugo ta empatá e partido 2-2 pa Young Boys.
Na di 85 minüt, Farson Rijna ku a hunga un tremendo partido, ta hasi e partido 3-2 pa s.v. Young Boys, loke a resultá sufisiente pa bai ku e viktoria di 3-2 riba s.v. Atl. Flamingo.
Ku e resultado aki s.v. Young Boys ta keda di tres lugá i s.v. Atl. Flamingo di kuater lugá di e torneo.
Un danki di parti s.v. Uruguay na e fanatikada ku a paga pa mira e partidonan fin di siman pasá.

Share This
error: Content is protected !!