KRALENDIJK – Curoil a keda aserká pa algun partido tokante di e holó di gasolin i e relashon ku ta keda hasí entre e holó ku e kalidat di e produkto. En konekshon ku esaki, Curoil ta enfatisá ku na momento di hasi kompra di produkto, Curoil ta hasi esaki a base di e spesifikashonnan di kalidat ku a keda stipulá dor di gobièrnu. Pa sigurá ku e produkto ta konforme e spesifikashonnan vigente, tur produkto ta pasa dor di un proseso di kontròl rigoroso.

Manera ya ta konosí, Curoil ta hasi kompra di produkto riba merkado internashonal. Na momento di hasi kompra, Curoil ta pidi oferta na diferente proveedor ku ta registrá serka e kompania. Pa yega na un eskoho den e proseso di bidding, Curoil ta pone énfasis primordialmente riba dos aspekto kual ta preis i kalidat. Pa loke ta trata e aspekto di kalidat, na momento ku e kompania ta hasi entrega di produkto na Curoil, e mester entregá un rapòrt di laboratorio pa indiká ku e kontenido di e produkto ta kuadra ku e spesifikashonnan rekerí. Ademas, den e proseso logístiko na 2 diferente momento Curoil ta laga hasi kontròl riba diferente aspekto di kalidat di e produkto. E kontròlnan ta tuma lugá di forma imparsial dor di diferente kompanianan di inspekshon lokal. A base di e resultado, Curoil ta konfirmá si e produkto risibí ta kuadra ku e spesifikashonnan vigente. Tur esaki ta pa sigurá ku entre e momento di kompra te na momento di suministro na pòmpnan di gasolin, e kalidat di e produkto ta konforme spesifikashon.

Pa loke ta trata e normanan di kalidat stipulá dor di gobièrnu, ta bon pa splika ku gasolin i diesel ta konsistí di diferente komponente. Algun di e komponentenan aki ta keda regulá pa medio di un mínimo/máksimo kantidat di e komponente ku por tin den e produkto. Esaki por trese un variashon den e komposishon eksakto di e produkto, basta ku e kantidat di komponentenan ta den e márgen stipulá pa gobièrnu. Un sierto márgen di variashon den e komposishon di e produkto, por kondusí na un variashon den e holó di e produkto. Konsekuentemente, no ta sin mas por hasi e konotashon ku holó di e produkto tin un konekshon direkto ku e kalidat.

Manera tur produkto ku ta subi riba nos merkadonan, e batch di produkto ku tin aktualmente den sirkulashon, tambe a pasa den e proseso pa garantisá kalidat. Apesar di esaki, i mirando e inkietut ku a reina, Curoil a haña na su lugá pa laga hasi algun tèst adishonal na un laboratorio independiente internashonal. Den bista di e pandemia di Covid-19, e proseso logístiko pa manda e produkto pa keda analisá den eksterior a tuma mas tantu tempu ku normal. Curoil ta en espera di e resultado di e tèstnan aki i lo komuniká debidamente na momento ku e resultadonan ta konosí.

Share This
error: Content is protected !!