Kralendijk – Lider polítiko di partido UPB Pablo James Kroon den un komunikado ta trese dilanti ku e situashon sosio-ekonómiko prekario i e lucha basa riba e relashon ku País madre Hulanda pa logra sosten al kaso, ku País ruman Kòrsou ta travesando, ta pidi pa komprenshon, solidaridat i sosten na lugá di hasimentu di chèrchi òf komparashon ku situashonnan ku por a presentá den e struktura Antiano.

Mi ta trese e punto aki dilanti komo lider polítiko di UPB, pasobra na diferente sitio i den diferente gremio, mi tabata testigu di kòmbersashonnan motivá dor di sentimentunan di rabia i vengansa, ku tin nan orígen den e struktura Antiano. Kòmbersashonnan ku ta duna muestra di goso i hubilo pasobra ku nos paísnan ruman ta pasando tempunan mas difísil kompará ku nos situashon aktual. Esaki ta algu ku a tokami fuertemente.

Mi ta di opinion ku tipo di ekspreshon i sentimentunan aki ta robes. Grandinan sa bisa; “ora ku kas di bo bisiña ta na kandela, kue hèmber di awa i yud’é paga e kandela pa e kandela no jega na bo kas”. Ami ke pone e dicho aki den un konteksto humanitario. Nos ta hende i den e kaso aki nos tur a sali for di e mesun kas ku ta Antías. Esaki ta hasi nos islanan ruman. I komo hende i komo ruman nos no ta frega salu den herida di otro!

Den nos vishon komo partido UPB i for di e ideología Kristian demókrata, ta ankrá e obligashon moral i étiko pa saka man yuda e próhimo den nesesidat, pa huntu nos tur kana pa dilanti. Ta pa e motibu aki mi ke hasi un súplika na nos komunidat, pa den espíritu i pa esnan ku por den akshon, duna e sosten na e pueblo(nan) di Kòrsou, Aruba i Sint Maarten, i nan mandatarionan. Ban spera ku nan lo por logra lo mihó pa nan pueblonan.

Hasi bon pa bon bini i no paga malu ku malu.

Share This
error: Content is protected !!