KRALENDIJK – Tin un kaso andando aki na Boneiru kaminda tur tres diputado aktual a entregá keho di menasa ku morto riba nan. E kaso ta den man di Ministerio Públiko. Ta trata di un persona bibá na Boneiru. Ministerio Públiko a papia ku e persona relashoná ku e loke el a skirbi riba ‘Facebook’. A papia ku e persona i el a aseptá ku el a pone e teksto aki. E diputadonan a risibi menasa serio kontra nan bida. E teksto kontra diputado Elvis Tjin Asjoe, Nina den Heyer i James Kroon ta bisa: ”No ta e makambanan tin ku mata, ta e diputadonan ku a buta nan na poder, Elvis, James i Nina. Esaki a risibí un kantidat grandi di reakshon. Diputado den Heyer i Tjin Asjoe a ‘share’ e teksto riba ‘Facebook’, pa tur hende tuma nota, kon leu hende ta bai, pa akusá otronan pa medio di media sosial. Hopi di esnan ku a reakshoná a urgi diputadonan pa entregá keho. Otro nan a bisa ku Ministerio Públiko mester a aktua mesora ku man duru, pasobra loke a sosodé ta algu serio. Ministerio Públiko a aktua i a interogá e hòmber. A traha tambe un prosèsverbal di su deklarashon. Awor e kaso ta den man di Ministerio públiko, pa nan tuma e desishon si ta sigui ku e kaso mas leu si òf no.  

Share This
error: Content is protected !!